अकोला न्यूज नेटवर्क ब्युरो दिनांक ७ जून रिपोर्टर अनुराग अभंग :- अकोला शहरातील एकविरा मैदानात खुलेआम दारू पिणाऱ्या तळीरामांवर पोलिसांचा धडक कारवाईचा बडगा. पोलीस अधीक्षक अर्चित चांडक यांच्या आदेशानंतर पोलिसांनी गुत्त्यांत बदललेल्या सार्वजनिक जागांवर धाड टाकली. चार दुचाकी, दोन चारचाकी ताब्यात, काही आरोपी राजकीय व व्यापारी वर्तुळातील असल्याची माहिती. “पंधरा मिनिटांची मजा, पण कायमची सजा” या ब्रीदवाक्याच्या आधारे पोलिसांचा गुनहगारांना इशारा. वाचा सविस्तर वृत्त.
खुल्या मैदानात दारूचे घोट, पण पोलिसांनीच झिंग उतरवली!
अकोला शहरातील तळीराम मंडळींचा थाट काही औरच. मिळेल त्या मैदानात किंवा कोपऱ्यावर दारूचे घोट आणि सिगारेटचे झुरके मारत गप्पांची मैफल रंगवायची. मात्र, यांचे हे दारूकुशल व्यवहार अखेर अकोला पोलीस अधीक्षक अर्चित चांडक यांच्या लक्षात आले आणि मग काय, पोलीसांच्या कारवाईने गोरक्षण रोड स्थित एकविरा मैदानात माजलेली मस्ती एका रात्रीत उतरली.
गौरक्षण रोडवरील एकविरा मैदानात गेल्या काही महिन्यांपासून अनेक तळीरामांची टोळी नियमित हजेरी लावत होती. हळूहळू हे ठिकाण म्हणजे खुलेआम दारू प्यायचं ‘क्लब’ झालं होतं. पण याच मैदानावर पोलिसांनी अचानक छापा टाकत मोठी कारवाई केली आणि दारूप्रेमींना थेट कायद्याच्या घेर्यात घेतलं.
पंधरा मिनिटांची मजा, पण कायमची सजा” – पोलिसांचा धडाका
अकोला शहर उपविभागीय पोलीस अधिकारी, खदान पोलीस स्टेशनचे निरीक्षक आणि त्यांच्या चमूने संयुक्तपणे ही कारवाई केली. उशिरा रात्रीपर्यंत ही मोहीम चालली आणि त्यात चार दुचाकी आणि दोन चारचाकी वाहने ताब्यात घेण्यात आली.
विशेष बाब म्हणजे या कारवाईत काही व्यापारी, सामाजिक आणि राजकीय मंडळींचा सहभाग असल्याचे समोर आले असून, पोलिसांनी कोणतीही गय न करता सर्वांवर कायदेशीर कारवाई केली.
कारवाईदरम्यान काही पकडण्यात आलेल्या तळीरामाना सोडवण्यासाठी राजकीय व व्यापारी वर्तुळातून दबाव टाकण्याचेही प्रयत्न झाले असल्याची माहिती सूत्रांकडून मिळत आहे, मात्र पोलिसांनी आपल्या भूमिकेत ठाम राहत कोणालाही सवलत दिली नाही. त्यामुळे खदान पोलीस स्टेशनच्या परिसरात तणावाचं वातावरण तयार झालं होतं.
पोलिसांची कडक सूचना: “दारू प्यायची असेल, तर घरातच प्या!”
अकोला पोलीस अधीक्षक अर्चित चांडक यांनी ‘सार्वजनिक ठिकाणी मद्यप्राशन करणे हा कायद्याने गुन्हा आहे आणि असे वर्तन करणाऱ्यांना कोणतीही सवलत मिळणार नाही,’ असा स्पष्ट इशारा दिला आहे.
ही कारवाई केवळ एकविरा मैदानापुरती मर्यादित राहणार नसून, शहरातील इतर सार्वजनिक जागा जिथे असे प्रकार घडतात, तिथेही धाडी टाकल्या जाणार आहेत. “शहराला गुन्हेगारीमुक्त ठेवण्यासाठी पोलिसांचे हे पाऊल गरजेचेच आहे,” असं अनेक नागरिकांनी सांगितलं.
अकोल्यातील खुल्या मैदानात ‘दारू अड्डे’ सुरूच?
एकविरा मैदान हा केवळ उदाहरण. शहरात अनेक ठिकाणी अशा उघडपणे दारू पिण्याच्या घटना सातत्याने घडत आहेत. रेल्वे स्टेशनजवळचे मैदान, न्यायालया समोरील मोकळी जागा, क्रीडा संकुल, नाना उजवणे यांच्या घरा समोरील मोकळे मैदान, मोकळी प्लॉट्स, सार्वजनिक उद्याने, एखाद्या झाडाच्या आडोशाला संध्याकाळी चालणाऱ्या पार्ट्यांची पोलिसांनी नोंद घेतली आहे.
शहरातील नागरीक, विशेषतः महिला आणि कुटुंबीयांना अशा ठिकाणांवरून फिरताना भीती वाटते. त्यामुळे अशा कारवायांनी फक्त तळीराम नव्हे, तर सामान्य नागरीकांनाही दिलासा मिळाला आहे.
वाचकहो, तुमचा मत महत्त्वाचं आहे!
अशा असामाजिक प्रवृत्तीविरुद्ध पोलीस यंत्रणा पाऊल उचलते तेव्हा आपलीही जबाबदारी वाढते. सार्वजनिक ठिकाणी होणाऱ्या गैरप्रकारांना वेळीच विरोध करणे, पोलिसांना माहिती देणे ही समाजाच्या सुरक्षिततेसाठी आवश्यक आहे.
तुमच्या परिसरात असे प्रकार दिसले तर नक्कीच आम्हाला 👉 https://tinyurl.com/3mb7zrjj 👈 या लिंक वर क्लिक करून माहिती द्या, अशाच बातम्या आणत राहू, तुमच्या सुरक्षा आणि हितासाठी!
तुमचे मत खाली कमेंटमध्ये जरूर नोंदवा आणि आणखी बातम्यांसाठी आमच्या वेबला भेट देत राहा.
[कॉपीराईट © 2025 | ANN Akola News Network]
