अकोला न्यूज नेटवर्क ब्यूरो दिनांक ११ फेब्रुवारी :- हिंदू साठी मटणाला मल्हार सर्टिफिकेशन आणणार असल्याचं नितेश राणे यांनी म्हटलंय. ज्या दुकानात मल्हार सर्टिफिकेशन असेल तिथंच मटण खरेदी करा असं आवाहन त्यांनी केलंय. सोशल मीडिया अकाउंटवर नितेश राणेयांनी याबाबत पोस्ट केलीय. मल्हार सर्टिफिकेशनसाठी साइटही सुरू करण्यात आल्याची त्यांनी माहिती दिलीय. यानंतर हलाल मटण आणि झटका मटण याची चर्चा सोशल मीडियावर सुरू झालीय.
आम्ही महाराष्ट्रातल्या हिंदू समाजासाठी अतिशय महत्त्वाचे पाऊल उचलले आहे. मल्हार सर्टिफिकेशन डॉट कॉम(https://malharcertification.com) या निमित्ताने सुरू झालेलं आहे. मल्हार सर्टिफिकेशनच्या माध्यमातून आपल्याला आपल्या हक्काची मटण दुकानं उपलब्ध होतील व १०० टक्के हिंदू समाजाचा प्राबल्य असेल व विकणारा व्यक्ती देखील हिंदू असेल. कुठेही मटणामध्ये भेसळ झालेले आढळणार नाही असंही नितेश राणे यांनी म्हटलं आहे.
हलाल मांस म्हणजे काय?
हलाल पद्धतीने जनावरांची कत्तल करणे म्हणजे जनावराच्या मानेवरील रक्तवाहिनीवर एक कट मारला जातो. त्यामुळं प्राण्याच्या शरीरातील सर्व रक्त बाहेर येते. पण या प्रक्रियेत प्राण्याचा तडफडून मृत्यू होतो. इस्लामिक श्रद्धेनुसार, फक्त हलाल मांसच खाऊ शकतात. हलाल करताना जनावराच्या शरीरातून संपूर्ण रक्त बाहेर पडण्याची वाट पाहिले जाते. तसंच, प्राणी मेल्यानंतर त्याच्या शरीराचे वेगवेगळे हिस्से केले जातात. या प्रक्रियेला जिबाह असंही म्हणतात. बकरी ईदला हलाल पद्धतीने मेंढ्या आणि बकऱ्यांचा बळी दिला जातो. त्यासाठी प्राणी निरोगी आणि जिवंत असणे गरजेचे आहे. इस्लामप्रमाणेच ज्यूदेखील हलाल प्रकारचे मटण खातात. त्यांला कोशेर असं म्हणतात. दोन्ही धर्मांमध्ये अशा प्रकारे प्राण्यांची कत्तल त्या त्या धर्माच्या व्यक्तीनेच करणे बंधनकारक असते. सोबतच दोन्ही प्रकारच्या प्रक्रियेत डुक्कर हा प्राणी वर्ज्य असतो.
झटका मांस म्हणजे काय?
एकाच वेळी धारदार शस्त्राने प्राण्याची मान एका झटक्यात धडापासून वेगळी करणे याला झटका पद्धत म्हणतात. असे म्हणतात की, झटक्यातील प्राण्याला मारण्यापूर्वी त्याला बेशुद्ध केले जाते, जेणेकरून प्राण्याला जास्त वेदना होत नाहीत. हलाल मांस असो की झटक्याचे मांस, दोन्ही पद्धतीत प्राणी मरतात. फरक म्हणजे मारण्याची पद्धत बदलते. हलाल करण्यापूर्वी जनावराला पोट भरून खायला दिले जाते तर झटक्याला उपाशी ठेवले जाते.
झटता पद्धतीचा अवलंब करणाऱ्यांचे म्हणणे आहे की, प्राण्यांना यात वेदना होत नाहीत कारण त्यांचा जीव एका झटक्यात घेतला जातो. तर हलाल फूड अथॉरिटी (HFA) नुसार, कोणत्याही प्राण्याला मारण्यासाठी बेशुद्ध केले जाऊ शकत नाही.
झटका पद्धतीत होतो ब्लड क्लॉटिंग
झटका मांसाच्या विरोधात लोकांचे सर्वात मोठे मत हे आहे की ते आरोग्यासाठी चांगले नाही. पण कसे? याचे कारण रक्त गोठणे आहे. झटक्याने कापलेल्या प्राण्यामध्ये रक्त गोठण्याची प्रक्रिया वेगाने सुरू होते. त्यामुळे कापलेल्या ठिकाणी रक्ताच्या गुठळ्या गोठतात आणि ही प्रक्रिया संपूर्ण जनावरात होऊ लागते. रक्त गोठल्यामुळे जनावराचे रक्त पूर्णपणे बाहेर येत नाही आणि ते मांसाच्या तुकड्यात गोठू लागते. त्यामुळे मांसही कडक होते आणि रक्ताचे प्रमाण जास्त असल्याने हे मांस जास्त काळ निरोगी राहू शकत नाही, म्हणजेच ते लवकर खराब होते.
काय असते ब्लड क्लॉटिंग?
रक्त गोठणे ही अशी प्रक्रिया आहे, जी जखम झाल्यावर सुरू होते, जेणेकरून शरीरातून जास्त रक्त बाहेर येऊ नये. वास्तविक, जेव्हा कोणत्याही जिवंत शरीरावर जखम होते आणि रक्तस्त्राव सुरू होतो, तेव्हा रक्तातील प्लेटलेट्स आणि प्लाझ्मा एकत्र रक्त जमा करण्याचे काम करतात. ज्याला रक्त गोठणे म्हणतात.
नितेश राणे यांच्या या घोषणेनंतर, राज्यातील राजकीय वातावरण तापले आहे. विरोधकांनी या उपक्रमावर टीका केली आहे. माजी मंत्री जितेंद्र आव्हाड यांनी या निर्णयावर आक्षेप घेतला असून, ते म्हणाले की, “हलाल म्हणजे कायदेशीर रित्या असलेलं मटण. आपल्या धार्मिक परंपरेतही हलाल पद्धतीनेच बळी दिले जातात.” तसेच, राष्ट्रवादी काँग्रेसचे आमदार रोहित पवार यांनी प्रश्न उपस्थित केला आहे की, “मल्हार प्रमाणपत्र देणारी कंपनी कुणाची आहे? जर ही योजना सरकारची आहे, तर मुख्यमंत्री देवेंद्र फडणवीस यांनी या योजनेचं उद्घाटन करायला हवं होतं.”
या उपक्रमामुळे मटण विक्री व्यवसायात हिंदू विक्रेत्यांना प्रोत्साहन मिळेल, असे नितेश राणे यांचे म्हणणे आहे. मल्हार सर्टिफिकेशनच्या माध्यमातून, ग्राहकांना शुद्ध आणि भेसळमुक्त मटण मिळेल, असा त्यांचा दावा आहे. तथापि, या निर्णयामुळे समाजात धार्मिक ध्रुवीकरण वाढण्याची शक्यता आहे, अशी चिंता व्यक्त केली जात आहे.
हलाल आणि झटका पद्धतींमधील फरकांवर अनेकदा चर्चा होत असते. काही संशोधनानुसार, झटका पद्धतीत जनावराच्या शरीरात रक्त पूर्णपणे बाहेर न पडल्यामुळे, मांसामध्ये रक्ताचे थक्के तयार होण्याची शक्यता असते, ज्यामुळे मांसाची गुणवत्ता प्रभावित होऊ शकते. दुसरीकडे, हलाल पद्धतीत रक्त पूर्णपणे बाहेर पडल्यामुळे, मांस अधिक शुद्ध मानले जाते.
मल्हार सर्टिफिकेशन उपक्रमामुळे मटण विक्री व्यवसायात नवीन दिशा मिळेल की धार्मिक वाद वाढतील, हे पाहणे महत्त्वाचे ठरेल. ग्राहकांनी आपल्या श्रद्धा आणि आवडीनुसार निर्णय घ्यावा, परंतु समाजातील सलोखा आणि एकता अबाधित ठेवणे ही सर्वांची जबाबदारी आहे.
