अकोला न्युज नेटवर्क ब्युरो दिनांक २ फेब्रुवारी २०२५:- अकोट-अकोला मार्गावर पुन्हा एकदा भयंकर अपघात झाला आहे. या अपघातात डांबर वाहून नेणारा टँकर पलटी झाला असून, चालक गंभीर जखमी झाला आहे. स्थानिक नागरिकांनी हा अपघात रस्त्याच्या अतिशय खराब अवस्थेमुळे झाल्याचे सांगितले आहे. अकोला जिल्ह्यातील हा महत्त्वाचा मार्ग गेल्या अनेक वर्षांपासून खराब स्थितीत असून, प्रशासनाने याकडे दुर्लक्ष केल्याने अपघातांची मालिका सुरूच आहे.
अपघाताचा थरारक घटनाक्रम
मिळालेल्या माहितीनुसार, डांबर वाहून नेणारा टँकर मंगळवारी सकाळी अकोटहून अकोलाच्या दिशेने जात होता. रस्त्यावरील खड्डे आणि वळण रस्त्याचे शेजारी संरक्षक कठडे नसल्यामुळे चालकाचा गाडीवरील ताबा सुटला आणि टँकर रस्त्याच्या कडेला जाऊन पलटी झाला. या अपघातात चालक गंभीर जखमी झाला असून, त्याला तातडीने जवळच्या रुग्णालयात हलवण्यात आले. सुदैवाने, मोठी दुर्घटना टळली.
स्थानिक नागरिकांचा संताप
अपघातानंतर स्थानिक नागरिकांनी प्रशासनाच्या निष्क्रियतेवर तीव्र नाराजी व्यक्त केली. या मार्गावर दररोज लहान-मोठे अपघात होत असतात. विशेषतः अकोट अकोला जाणारा मुख्य रस्ता असल्याने अवजड वाहने या मार्गावरून जात असताना मोठ्या अडचणींना सामोरे जातात. अपघाताच्या ठिकाणी मोठ्या प्रमाणावर गर्दी झाली होती सार्वजनिक बांधकाम विभागाच्या कामामुळे नेहमीच या मार्गांवर अपघात मालिका सुरु असून या दुर्लक्षामुळे अनेक अपघात होत आहेत, आणि निष्पाप नागरिकांना आपला जीव गमवावा लागत आहे.
रस्त्याच्या दुरुस्तीची गरज
अकोट-अकोला हा मुख्य महामार्ग असून तो जिल्ह्यातील तसेच दोन राज्यांना अत्यंत महत्त्वाचा मार्ग आहे. या मार्गावरून अनेक वाहने दररोज प्रवास करतात, त्यात ट्रक, बसेस, खासगी प्रवाशी वाहतूक, मोटरसायकल आणि टँकर्स यांचा समावेश आहे. मात्र, खराब रस्त्यांमुळे चालकांना सतत अडथळ्यांना सामोरे जावे लागते.
