2025 हे वर्ष निरोप घेण्याच्या तयारीत असून अवघ्या काही दिवसांत 2026 या नवीन वर्षात आपण प्रवेश करणार आहोत. नववर्षाची सुरुवात केवळ सण-उत्सवांनीच नव्हे, तर सामान्य नागरिकांच्या खिशावर थेट परिणाम करणाऱ्या महत्त्वाच्या नियमबदलांनी होणार आहे. सरकारी कर्मचाऱ्यांचा पगार, कर्जाचे हप्ते, रेशन, पॅन-आधार, शेतकरी योजना आणि गॅस सिलिंडरचे दर अशा अनेक बाबींमध्ये 1 जानेवारी 2026 पासून बदल लागू होण्याची शक्यता आहे. जाणून घ्या सविस्तर आढावा.
1) 8 वा वेतन आयोग: पगारवाढीची आशा
7 व्या वेतन आयोगाचा कालावधी 31 डिसेंबर 2025 रोजी संपत आहे. त्यामुळे 1 जानेवारी 2026 पासून 8 वा वेतन आयोग लागू होण्याची दाट शक्यता आहे. लागू झाल्यास किमान पगार, भत्ते आणि पेन्शनमध्ये मोठी वाढ होऊन लाखो कुटुंबांना दिलासा मिळू शकतो.
2) कर्जदारांना दिलासा: EMI कमी होण्याची शक्यता
RBI कडून रेपो दरात कपात झाल्याने गृहकर्ज, कार लोन व वैयक्तिक कर्जांचे व्याजदर कमी होऊ शकतात. परिणामी मासिक EMI घटून मध्यमवर्गीयांच्या बजेटवरचा ताण कमी होईल.
3) क्रेडिट स्कोअर 14 दिवसांत अपडेट
1 जानेवारीपासून बँका व NBFC संस्था दर 14 दिवसांनी क्रेडिट ब्युरोला माहिती देणार आहेत. वेळेवर हप्ते भरल्यास क्रेडिट स्कोअर लवकर सुधारेल आणि कर्ज मिळणे सोपे होईल.
4) रेशन कार्ड E-KYC अनिवार्य
31 डिसेंबर 2025 पर्यंत रेशन कार्डचे E-KYC पूर्ण न केल्यास 1 जानेवारीपासून मोफत किंवा सवलतीचे रेशन बंद होऊ शकते. कुटुंबातील सर्व सदस्यांचे KYC आवश्यक आहे.
5) पॅन-आधार लिंकिंग
31 डिसेंबरपर्यंत पॅन-आधार लिंक न केल्यास पॅन निष्क्रिय होईल. यामुळे मोठे आर्थिक व्यवहार, खाते उघडणे व आयकर परतावा अडचणीत येऊ शकतो.
6) शेतकरी आयडी (Kisan ID)
सरकारी योजना, अनुदान व DBT साठी युनिक शेतकरी आयडी अनिवार्य ठरणार आहे. आयडी नसल्यास लाभ मिळण्यात अडचणी येऊ शकतात.
7) LPG व विमान प्रवास
1 जानेवारीला LPG व ATF दर जाहीर होतील. गॅस स्वस्त झाल्यास घरगुती बजेटला दिलासा, तर ATF बदलांमुळे विमान तिकिटांचे दर बदलू शकतात.
तज्ज्ञांचा सल्ला:
31 डिसेंबरपूर्वी रेशन E-KYC, पॅन-आधार लिंकिंग पूर्ण करा. कर्जदारांनी व्याजदरातील बदलांवर लक्ष ठेवा आणि आर्थिक नियोजन आधीच ठरवा, म्हणजे नववर्षातील बदलांचा जास्तीत जास्त फायदा घेता येईल.
