पहाट होती… रस्ता शांत होता…आणि एका क्षणात तोच रस्ता जळत्या कब्रस्तानात बदलला.कर्नाटकातील चित्रदुर्गजवळ आज जे घडलं, ते अपघात होता की बेदरकारपणाचा स्फोट—हा प्रश्न उरतो. समोरून येणारी आराम बस, अचानक धडकणारा कंटेनर आणि काही सेकंदांत भडकलेली आग… प्रवाशांना बाहेर पडायलाही वेळ मिळाला नाही. धूर, आगीच्या ज्वाळा आणि किंकाळ्यांनी पहाटेची शांतता फाडून टाकली. या भीषण घटनेत अनेकांचे प्राण एका झटक्यात संपले, तर जिवंत वाचलेल्यांच्या मनावर न भरून येणाऱ्या जखमा उमटल्या.
प्राथमिक माहितीनुसार, कंटेनर ट्रकने आधी रस्त्यावरील दुभाजकाला जोरदार धडक दिली. त्यानंतर तो समोरून येणाऱ्या आराम बसवर आदळला. धडकेमुळे कंटेनर ट्रकची डिझेल टाकी फुटली, ठिणग्या उडाल्या आणि काही क्षणांतच आराम बसने पेट घेतला. बसमध्ये एकूण ३२ प्रवासी प्रवास करत होते. बस गोकर्णकडे निघाली होती.
बसला आग लागल्यानंतर काही प्रवाशांना बाहेर पडण्यात यश आलं, मात्र अनेक प्रवासी आगीत अडकले. त्यामुळे त्यांचा होरपळून मृत्यू झाला. उत्तर विभागाचे आयजीपी यांनी दिलेल्या माहितीनुसार, बसचा चालक आणि क्लीनर यांनी वेळीच उडी मारल्याने त्यांचे प्राण वाचले. मात्र कंटेनर ट्रकचा चालक आणि क्लीनर यांचा घटनास्थळीच मृत्यू झाला.
जखमींना तातडीने हिरियूर येथे प्राथमिक उपचार देण्यात आले असून, पुढील उपचारांसाठी त्यांना चित्रदुर्ग जिल्हा रुग्णालयात हलवण्यात आले आहे. प्राथमिक तपासात कंटेनर ट्रक चालकाच्या बेजबाबदारपणामुळेच हा अपघात घडल्याचे निष्पन्न झाले आहे.
दरम्यान, या अपघातात मृत्यू झालेल्या व्यक्तींच्या कुटुंबीयांना ५ लाख रुपयांची आर्थिक मदत देण्याची घोषणा कर्नाटकचे मुख्यमंत्री यांनी केली आहे. तसेच पंतप्रधान यांनीही या दुर्दैवी घटनेबद्दल तीव्र शोक व्यक्त केला आहे.
या भीषण अपघाताने पुन्हा एकदा रस्ते सुरक्षा, जड वाहनांची बेदरकार वाहतूक आणि प्रवासी सुरक्षेचा गंभीर प्रश्न ऐरणीवर आणला आहे.
