बांगलादेशातील जिल्ह्यात दीपू चंद्र दास (वय २७) या हिंदू युवकाची अत्यंत क्रूर पद्धतीने हत्या करण्यात आल्याची धक्कादायक घटना उघडकीस आली आहे. हत्येनंतर मृतदेह जाळण्यात आल्याची माहिती समोर आल्याने या प्रकरणाने केवळ बांगलादेशच नव्हे, तर संपूर्ण उपखंडात तीव्र प्रतिक्रिया उमटवल्या आहेत.
या हल्ल्यामागे ब्लास्फेमीचे आरोप कारणीभूत असल्याचा दावा केला जात असून, त्यामुळे धार्मिक अल्पसंख्याकांच्या सुरक्षेचा प्रश्न पुन्हा ऐरणीवर आला आहे. या घटनेनंतर भारत आणि बांगलादेश या दोन्ही देशांतील वातावरण तणावपूर्ण बनले असून, विविध सामाजिक व धार्मिक संघटनांकडून तीव्र निषेध व्यक्त केला जात आहे.
या हत्येच्या निषेधार्थ दिल्ली, कोलकाता, मुंबई, हैदराबाद तसेच जम्मू-काश्मीरसह देशातील अनेक शहरांमध्ये रॅली आणि निदर्शने करण्यात आली. बांगलादेशात हिंदू समाजावर होत असलेल्या कथित अत्याचारांविरोधात जोरदार घोषणाबाजी करत दोषींवर कठोर कारवाईची मागणी आंदोलकांनी केली.
दरम्यान, महाराष्ट्रातील शहरातही या घटनेचे तीव्र पडसाद उमटले. हिंदू संघटनांच्या वतीने जिल्हाधिकारी कार्यालयासमोर जोरदार आंदोलन करण्यात आले. मोठ्या संख्येने नागरिक सहभागी होत, बांगलादेश सरकारविरोधात निषेध नोंदवण्यात आला.
आंदोलकांनी बांगलादेशचे मोहम्मद युनूस तसेच दहशतवाद्यांचा प्रतिकात्मक पुतळा दहन करत संतप्त भावना व्यक्त केल्या. बांगलादेशात अल्पसंख्याकांवर होणारे अत्याचार तात्काळ थांबवावेत, तसेच या प्रकरणात आंतरराष्ट्रीय पातळीवर हस्तक्षेप व्हावा, अशी ठाम मागणी यावेळी करण्यात आली.
ही घटना केवळ एका हत्येपुरती मर्यादित नसून, धार्मिक सहअस्तित्व, मानवी हक्क आणि अल्पसंख्याकांच्या सुरक्षेचा गंभीर प्रश्न असल्याचे अनेक संघटनांचे मत आहे. आता या प्रकरणावर बांगलादेश सरकार कोणती ठोस पावले उचलते, याकडे संपूर्ण जगाचे लक्ष लागले आहे.
