अकोला न्यूज नेटवर्क ब्युरो दिनांक २९ नोव्हेंबर २०२५:तेलंगणा राज्यातील सीतापूरमहून जळगाव खान्देश येथे लग्नसोहळ्यासाठी कारने निघालेलं पाटील दांपत्य गेल्या दोन दिवसांपासून रहस्यमयरीत्या बेपत्ता होते. खामगाव ते मलकापूर दरम्यान गायब झाल्यानंतर नातेवाईक, मित्रपरिवार आणि पोलिस यांच्यात मोठी धावपळ सुरू झाली होती. या शोधामध्ये आज मोठा धक्कादायक खुलासा झाला आहे. वडनेर भोलजी परिसरातील एका विहिरीत मिळालेली कार ही पाटील दांपत्याचीच असल्याचे निश्चित झाले असून, कारमधून दोघांचेही मृतदेह आढळले आहेत.
जळगावचे पद्मसिंह दामू पाटील आणि त्यांची पत्नी नम्रता हे दोघेही सीतापूरम येथील खाजगी सिमेंट कंपनीत कार्यरत होते. पाचोरामधील लग्न सोहळ्यासाठी ते त्यांच्या कारने (MH-13-BN-8583) रवाना झाले. प्रवासादरम्यान त्यांचे शेवटचे मोबाईल लोकेशन बुलढाणा जिल्ह्यातील वडनेर गावाजवळ नोंदले गेले. त्यानंतर फोन स्विच ऑफ, संपर्क तुटला आणि दोघेही गायब झाल्याची तक्रार नांदुरा पोलिसात दाखल झाली.
तक्रारीनंतर पोलिसांनी दोन दिवस युद्धपातळीवर शोधमोहीम राबवली. महामार्गावरील सीसीटीव्ही फुटेज, टोल नाक्यावरील नोंदी, आसपासच्या गावांतील हालचाली यांची पडताळणी सुरू होती. दरम्यान आज दुपारी वडनेर भोलजीजवळ महामार्गालगत असलेल्या एका विहिरीत पांढरी कार असल्याची माहिती मिळाली. ग्रामस्थांनी दिलेल्या माहितीनंतर पोलिसांनी तातडीने घटनास्थळी धाव घेत क्रेनच्या सहाय्याने कार बाहेर काढण्याचे आले.
कार बाहेर आल्यानंतर आतमध्ये दोन मृतदेह आढळले आणि ते पाटील दांपत्याचे असल्याची पुष्टी झाली. या घटनेने परिसरात आणि जळगाव–बुलढाणा जिल्ह्यांत हळहळ व्यक्त होत आहे.
घटना अपघात की घातपात याबाबत अजून स्पष्टता नाही. कार विहिरीत कशी गेली? ब्रेक फेल झाला की वाहनाला कोणीतरी जाणूनबुजून वळवले? महामार्ग सुरक्षित असताना एवढ्या खोल विहिरीत कार जाण्याची शक्यता कशी निर्माण झाली? हे प्रश्न आता तपासाच्या केंद्रस्थानी आहेत.
नांदुरा पोलिसांनी जागेवर पंचनामा करून पुढील तपास सुरू केला आहे. एफएसएल तज्ज्ञ, क्राइम ब्रांच पथक आणि बुलढाणा ग्रामीण पोलिसांचा सहाय्यक पथक घटनास्थळी दाखल झाले आहे. कारमधील नुकसान, टायर मार्क्स, रस्त्यावरील खुणा आणि लोकेशन हिस्ट्री यांच्या आधारे अपघात की घातपात याचा ताळमेळ लावला जाणार आहे.
या घटनेमुळे संपूर्ण खान्देश आणि विदर्भात शोकाकुल वातावरण आहे. लग्नाच्या आनंदात सहभागी होण्यासाठी निघालेले दांपत्य अशा परिस्थितीत मृतावस्थेत आढळल्याने हळहळ व्यक्त होत आहे. नातेवाईकांनी पोलिसांना तपास अधिक काटेकोरपणे करण्याची मागणी केली आहे. स्थानिकांनीही महामार्गावरील सुरक्षेची पुनर्पडताळणी करण्याची गरज व्यक्त केली आहे.
आतापर्यंत समोर आलेल्या माहितीनुसार पोलिसांनी एकही शक्यता फेटाळलेली नाही. कारची तांत्रिक तपासणी, मोबाईल लोकेशनची मागील ट्रेसिंग, टोल नाक्यावरील फुटेज यामुळे पुढील धागेदोरे मिळण्याची अपेक्षा आहे.
घटनेचा उलगडा होईपर्यंत संपूर्ण जिल्ह्याचे लक्ष या तपासावर केंद्रीत राहणार आहे.
