अकोला न्यूज नेटवर्क
अकोला : “माझ्या मृत्यूला माझी पत्नी आणि तिचं कुटुंब जबाबदार आहे…” असा जळजळीत आरोप करत अकोल्यातील संघपाल खंडारे या ३२ वर्षीय तरुणाने रेल्वेखाली उडी घेत आत्महत्या केली. मृत्यूपूर्वी त्याने बनवलेला व्हिडिओ सध्या सोशल मीडियावर व्हायरल होत असून, यात त्याने पत्नी व सासरच्या मंडळींवर मानसिक छळ, मारहाण व धमक्यांचे आरोप केले आहेत. या हृदयद्रावक घटनेने अकोला जिल्ह्यात मोठी खळबळ उडाली आहे.
प्रेमविवाहाचं रुपांतर त्रासदायक सहजीवनात
संघपाल खंडारे याने सात वर्षांपूर्वी शबनम फातिमा हिच्याशी प्रेमविवाह केला होता. सुरुवातीच्या काळात दोघांचे सहजीवन सुरळीत होते. मात्र, काही महिन्यांपासून त्यांच्यात वारंवार वाद होत होते. याच वादातून सोमवारी रात्री मोठा भांडणाचा प्रसंग घडला, ज्यामुळे संघपालने टोकाचे पाऊल उचलले.
“माझ्या मृत्यूला ती जबाबदार…” – मृत्यूपूर्वीचा भावनिक संदेश
आत्महत्येपूर्वी संघपालने एक व्हिडिओ रेकॉर्ड करून आपल्या मोठ्या भावाला पाठवला. त्यात त्याने सांगितले की, शबनम आणि तिच्या कुटुंबीयांनी पायल इलेक्ट्रॉनिक्सजवळ बेदम मारहाण केली. त्याने तीन लाखांचे कर्ज पत्नीच्या आग्रहावरून घेतले होते आणि त्याचे पैसेदेखील परत मिळाले नाहीत. सासरच्या लोकांकडून होणाऱ्या मानसिक त्रासामुळेच आत्महत्येचा निर्णय घेतल्याचे त्याने स्पष्ट केले.
रेल्वेखाली उडी घेऊन आयुष्य संपवलं
व्हिडिओ पाठवल्यानंतर काही तासांतच संघपाल खंडारे याचा मृतदेह पारस गावाजवळील अकोला-अमरावती रेल्वेमार्गावर आढळून आला. घटनेची माहिती मिळताच लोहमार्ग पोलिसांनी घटनास्थळी धाव घेतली आणि तपास सुरू केला.
पोलीस कारवाईला गती
संघपालच्या व्हिडिओच्या आधारे पोलिसांनी संबंधितांवर गुन्हा दाखल केला आहे. यातील दोन संशयितांना अटक करण्यात आली असून, सीसीटीव्ही फुटेज आणि अन्य पुरावे गोळा करून अधिक तपास सुरू आहे. या प्रकरणाने प्रेमविवाह, कौटुंबिक कलह आणि आत्महत्येच्या सामाजिक पातळीवरील गुंतागुंतीचे स्वरूप अधोरेखित केले आहे.
सामाजिक पातळीवर हादरा
संघपालचा सुसाईड व्हिडिओ आणि त्यामधील गंभीर आरोप समाजमनाला हादरवून टाकणारे आहेत. प्रेमविवाहातून सुरू झालेल्या नात्याचा असा शेवट होणे ही केवळ एक वैयक्तिक शोकांतिका नसून, सामाजिक चिंतनाचा मुद्दा बनली आहे. पोलिसांच्या तपासातून खरी सत्यस्थिती उजेडात येईल का, आणि संघपालला अपेक्षित न्याय मिळेल का, याकडे सर्वांचे लक्ष लागून आहे.
