अकोला न्यूज नेटवर्क
मुंबई : जुने नाते, जुने फोटो आणि त्यातून उगम पावलेली धमकी — या साऱ्याचा वापर करत बुलढाण्यातील एका तरुणाने अंधेरीतील विवाहित मैत्रिणीवर लैंगिक अत्याचार केल्याची धक्कादायक घटना उघड झाली आहे. आरोपीने पीडितेचे अश्लील फोटो व्हायरल करण्याची धमकी देत तिच्यावर जबरदस्ती केली आणि तिचे सोन्याचे दागिने घेऊन फरार झाला. डी. एन. नगर पोलिसांनी आरोपीविरुद्ध बलात्कार, धमकी आणि चोरीचे गंभीर गुन्हे दाखल करत त्याचा शोध सुरू केला आहे.
पीडित महिला २५ वर्षांची असून ती अंधेरी परिसरात राहते. तिची आरोपी योगेश (पूर्ण नाव अद्याप उघड नाही) या तरुणाशी पूर्वीपासून मैत्री होती. या मैत्रीतून काही खासगी फोटो तयार झाले होते. दरम्यान, तिचे दुसऱ्या तरुणाशी लग्न झाले. मात्र तीन दिवसांपूर्वी योगेशने तिला अंधेरीतील एका पार्कजवळ बोलावले. तेथे त्याने लग्नाबाबत विचारणा केली. नकार मिळाल्यावर त्याने पीडितेला तिचे अश्लील फोटो पती आणि नातेवाईकांना पाठवण्याची धमकी दिली.
त्याच दबावात त्याने पीडितेवर लैंगिक अत्याचार केला. इतकेच नव्हे, तर तिच्या गळ्यातील सोन्याची चेन व हातातील अंगठी हिसकावून घेऊन तो पळून गेला. यानंतर त्याने खरोखरच तिचे फोटो पतीला पाठवत बदनामी केली.
सावरण्यानंतर पीडितेने थेट डी. एन. नगर पोलिस ठाण्यात धाव घेत आरोपीविरुद्ध तक्रार दिली. पोलिसांनी त्याच्याविरुद्ध बलात्कार, चोरी, धमकी आणि आयटी कायद्यांतर्गत गुन्हे दाखल करून शोधमोहीम सुरू केली आहे. योगेश अद्याप फरार असून त्याचा शोध सुरू आहे.
