अकोला न्यूज नेटवर्क
नाशिक : पती-पत्नीच्या नात्याला काळिमा फासणारी आणि समाजाचे डोळे उघडणारी एक अत्यंत धक्कादायक घटना नाशिकमध्ये उघडकीस आली आहे. एका व्यक्तीने पत्नीच्या अश्लील व्हिडीओ चित्रीकरणानंतर तिला धमकी देत डान्सबारमध्ये जबरदस्ती नाचवले, अशी तक्रार पोलिसात दाखल झाली आहे. या प्रकरणामुळे शहरात संतापाची लाट उसळली असून पोलिसांनी गुन्हा दाखल करून तपास सुरू केला आहे.
डान्सबारमध्ये जबरदस्तीने नाचवले
या प्रकरणात आरोपी पती पवन गाडेकर याने आपल्या पत्नीला प्रथम गुंगीचे औषध देऊन तिचे अश्लील व्हिडीओ शूट केले. नंतर हे व्हिडीओ व्हायरल करण्याची धमकी देत तिला मानसिक व शारीरिक छळास सामोरे जावे लागले. त्यानंतर त्याने आपल्या मित्राच्या मदतीने पत्नीला जबरदस्ती डान्सबारमध्ये नाचण्यास भाग पाडले. या अत्याचाराविरोधात पीडित महिलेने पती आणि त्याच्या मित्राविरोधात नाशिकच्या पंचवटी पोलीस ठाण्यात तक्रार दाखल केली आहे.
काय आहे तक्रारीतील तपशील?
तक्रारीनुसार, आरोपी पती आणि त्याचा मित्र अक्षय गांगुर्डे या दोघांनी मिळून पीडित महिलेला वेळोवेळी शिवीगाळ, मारहाण केली. तिच्यावर मानसिक दबाव टाकत ब्लॅकमेल केलं आणि अखेर डान्सबारमध्ये नेऊन तिला नाचण्यास भाग पाडलं. ही घटना नाशिकच्या हिरावाडी परिसरात घडल्याचे समोर आले आहे.
पोलिसांचा तपास सुरू
सध्या या दोन्ही आरोपी फरार असून पोलिसांनी त्यांचा शोध सुरू केला आहे. पोलीस विभागाने याप्रकरणी कलम 354 (अ), 506, 509 आणि IT Act अंतर्गत गुन्हा दाखल केला आहे. आरोपीचा फोन सीझ करण्यात आला असून, व्हिडीओ, कॉल रेकॉर्डिंग आणि इतर डिजिटल पुरावे गोळा केले जात आहेत.
समाजात संतापाची लाट
या प्रकाराने नाशिकमध्ये प्रचंड संतापाची लाट उसळली असून महिला संघटनांनी तात्काळ कठोर कारवाईची मागणी केली आहे. अशा विकृत वृत्तीच्या व्यक्तींना समाजात थारा मिळू नये, अशी मागणी नागरिकांकडून होत आहे.
काय घडणार पुढे?
पोलीस या प्रकरणाचा सर्व बाजूंनी तपास करत आहेत. पती-पत्नीतील भांडणाचे पार्श्वभूमी, मित्राची भूमिका, धमकीची गंभीरता आणि पीडितेची मानसिक अवस्था यावर सखोल चौकशी होणार आहे. आरोपी लवकरच गजाआड जातील, अशी माहिती पोलीस सूत्रांनी दिली आहे.
