अकोला न्यूज नेटवर्क
लंडन : वर्ल्ड चॅम्पियनशिप ऑफ लीजेंड्स 2025 मध्ये भारत आणि पाकिस्तान यांच्यात होणारा उपांत्य फेरीचा सामना रद्द करण्यात आला आहे. भारताने पाकिस्तानविरुद्ध खेळण्यास नकार दिल्यामुळे पाकिस्तानचा थेट अंतिम फेरीत प्रवेश निश्चित झाला आहे. भारताच्या या निर्णयामुळे क्रिकेटविश्वात खळबळ उडाली आहे.
भारताच्या इंडिया चॅम्पियन्स संघाने आयोजकांना कळवले की, ते पाकिस्तानविरुद्ध कोणत्याही परिस्थितीत मैदानात उतरणार नाहीत. त्यामुळे नियोजित उपांत्य सामना रद्द करण्यात आला. हा सामना इंग्लंडमध्ये आज खेळवला जाणार होता.
भारताच्या या भूमिकेमागे एप्रिल 2025 मध्ये जम्मू-काश्मीरमधील पहलगाम येथे झालेल्या दहशतवादी हल्ल्याची पार्श्वभूमी असल्याचे मानले जाते. या हल्ल्यानंतर देशभरात पाकिस्तानविरोधात संतापाची लाट उसळली होती. त्याचा परिणाम क्रीडा क्षेत्रातही स्पष्टपणे दिसून येत आहे.
भारताच्या संघातील खेळाडूंनी स्पष्टपणे आपली भूमिका मांडली असून, राष्ट्रीय भावनांचा आदर करत त्यांनी पाकिस्तानसोबत सामना खेळण्यास स्पष्ट नकार दिला आहे. स्पर्धा आयोजकांनी देखील भारताच्या भूमिकेचा सन्मान राखत सामना रद्द करण्याचा निर्णय घेतला.
ही स्पर्धा वर्ल्ड चॅम्पियनशिप ऑफ लीजेंड्सचे दुसरे सत्र आहे. मागील सत्रात इंडिया चॅम्पियन्सने अंतिम सामन्यात पाकिस्तानला पराभूत करून विजेतेपद पटकावले होते. यंदाही भारताने उपांत्य फेरीपर्यंत वाटचाल केली होती, मात्र यावेळी संघाने देशहिताच्या भूमिकेतून स्पर्धा अर्धवट सोडण्याचा निर्णय घेतला.
दुसऱ्या उपांत्य फेरीत दक्षिण आफ्रिका आणि ऑस्ट्रेलिया यांच्यात सामना होणार असून, त्या विजेत्याचा सामना अंतिम फेरीत पाकिस्तानशी होणार आहे.
