अकोला न्यूज नेटवर्क
मुंबई : श्रावण महिन्याच्या सुरुवतीने सणांची चाहूल लागते आणि त्यात पहिल्या क्रमांकावर असतो रक्षाबंधन. भावंडांच्या प्रेमाचे प्रतीक असलेला हा सण यंदा ९ ऑगस्ट रोजी साजरा होणार असून त्यानिमित्ताने बाजारपेठा सजल्या आहेत. मात्र यंदा महागाईची झळ या सणावरही बसली असून राख्यांच्या दरात २० ते २५ टक्क्यांची वाढ झाली आहे, असे विक्रेत्यांनी सांगितले.
शहरातील बाजारपेठांमध्ये पारंपरिक राख्यांपासून ते लायटिंग, अ‍ॅनिमेटेड, पपेट, लाकडी, कडा राखी, कुंदन डिझाईन आणि देव-धर्म राख्यांची विविधता पाहायला मिळत आहे. कमीतकमी ५ रुपयांपासून सुरू होणाऱ्या या राख्यांच्या किमती ५५० ते ६०० रुपयांपर्यंत जात आहेत. मागील वर्षीच्या तुलनेत त्यात सरासरी २५ टक्क्यांची वाढ झाल्याचे व्यापाऱ्यांचे म्हणणे आहे.
बाजारात महिला आणि युवावर्गाची खरेदीला गर्दी
राखी निवडण्यासाठी महिला आणि मुलींची बाजारात मोठी वर्दळ आहे. भाऊरायासाठी विशेष राखी शोधण्यासाठी त्या विविध स्टॉल्सना भेट देत आहेत. दुसरीकडे, आपल्या बहिणीसाठी खास भेटवस्तू खरेदी करणाऱ्या तरुणांचाही बाजारपेठेत उल्लेखनीय सहभाग आहे. रक्षाबंधन हा सण बहिण-भावाच्या अतूट नात्याचा साक्षीदार असतो आणि त्या नात्याची आठवण राखीच्या माध्यमातून घट्ट केली जाते.
चिमुकल्यांसाठी कार्टून राख्यांची भरघोस मागणी
लहान भावासाठी छोटा भीम, डोरेमॉन, मोटू पतलू, श्रीकृष्ण आणि श्रीगणेशाच्या थीमवर आधारित राख्यांना विशेष मागणी आहे. टॉर्च आणि लायटिंग राख्याही मुलांमध्ये विशेष लोकप्रिय ठरत आहेत. यंदा सर्जिकल आणि सृजनशील राख्यांचा ट्रेंड पाहायला मिळतो आहे.
किमती वाढल्या तरी बाजारात उत्साह कायम
महागाईमुळे किमती वाढल्या असल्या तरी ग्राहकांचा उत्साह काहीसा ओसरलेला नाही. महिलावर्ग राखीच्या खरेदीसाठी सज्ज असून विक्रेत्यांनीही नवीन डिझाईन आणि आकर्षक सजावटीद्वारे ग्राहकांना आकर्षित करण्याचा प्रयत्न केला आहे. परिणामी रक्षाबंधनाच्या पार्श्वभूमीवर बाजारपेठांत उत्साहाचे वातावरण आहे.
