मुंबई, २९ जुलै २०२५: मुंबईतील अँटॉपहिल परिसरात १० वर्षीय मुलीवर खेळायला नेण्याच्या बहाण्याने लैंगिक अत्याचाराची धक्कादायक घटना घडली आहे. या प्रकरणी पोलिसांनी ३५ वर्षीय आरोपीला अटक केली आहे. पीडित मुलीला जीवे मारण्याची धमकी देणाऱ्या आरोपीविरुद्ध पोक्सो कायद्यांतर्गत गुन्हा दाखल करण्यात आला आहे.
ही घटना २० ते २६ जुलै २०२५ या कालावधीत घडली. पीडित मुलगी आणि तिचा अल्पवयीन भाऊ घराजवळ खेळत असताना आरोपीने त्यांना जवळच्या बागेत खेळायला नेण्याचे आमिष दाखवले. बागेत पोहोचल्यानंतर आरोपीने मुलीच्या भावाला खाऊ आणण्याच्या बहाण्याने दुसरीकडे पाठवले. मुलगी एकटी असल्याचे पाहून त्याने तिच्यावर अश्लील चाळे करत लैंगिक अत्याचार केले. अत्याचारानंतर मुलीला कुणाला सांगितल्यास जीवे मारण्याची धमकी दिली. घाबरलेल्या मुलीने घरी पोहोचल्यानंतर आपल्या आईला हा प्रकार सांगितला. त्यानंतर कुटुंबाने अँटॉपहिल पोलिस ठाण्यात तक्रार दाखल केली.
पोलिसांनी तात्काळ कारवाई करत आरोपीला अटक केली. प्राथमिक चौकशीत आरोपीने गुन्हा कबूल केला आहे. पोलिसांनी पोक्सो कायद्यांतर्गत गुन्हा दाखल करून तपास सुरू केला आहे. आरोपीविरुद्ध कठोर कारवाई करण्याचे आश्वासन पोलिसांनी दिले आहे.
मुंबईत अल्पवयीन मुलींवरील अत्याचाराच्या घटनांमध्ये गेल्या काही वर्षांत वाढ झाली आहे. २०२४ मध्ये पोक्सो कायद्यांतर्गत १३४१ गुन्ह्यांची नोंद झाली, तर २०२३ मध्ये ११०८ गुन्हे दाखल झाले होते. यापैकी ६०९ बलात्कार, ६६७ विनयभंग आणि ३५ छेडछाडीचे गुन्हे २०२४ मध्ये नोंदवले गेले. या आकडेवारीमुळे अल्पवयीन मुलींच्या सुरक्षेचा प्रश्न पुन्हा ऐरणीवर आला आहे. पोलिसांनी नागरिकांना सतर्क राहण्याचे आणि संशयास्पद व्यक्तींबाबत तक्रार करण्याचे आवाहन केले आहे.
