अकोला न्यूज नेटवर्क
नवी दिल्ली | संसदेत चालू पावसाळी अधिवेशनात ‘ऑपरेशन सिंदूर’वर विशेष चर्चा २९ जुलैपासून सुरू होणार असून सरकारने या चर्चेसाठी लोकसभा आणि राज्यसभेत प्रत्येकी १६ तासांचा वेळ राखून ठेवला आहे. विरोधकांच्या तीव्र मागणीनंतर सरकारने ही चर्चा निश्चित केली असून पंतप्रधान नरेंद्र मोदी, गृहमंत्री अमित शहा आणि संरक्षण मंत्री राजनाथ सिंह स्वतः चर्चा सुरू असताना उपस्थित राहणार असल्याची शक्यता वर्तवली जात आहे.
ही चर्चा सोमवारी लोकसभेत आणि मंगळवारी राज्यसभेत होणार आहे. मात्र विरोधकांनी ही चर्चा तत्काळ सुरू करावी अशी मागणी केली होती, परंतु मोदींच्या परदेश दौऱ्याचा हवाला देत सरकारने चर्चा २९ जुलैपर्यंत पुढे ढकलली.
‘ऑपरेशन सिंदूर’ संदर्भात अमेरिकेचे माजी राष्ट्राध्यक्ष डोनाल्ड ट्रम्प यांनी भारत-पाकिस्तानमध्ये शस्त्रविराम घडवून आणल्याचा दावा केला होता, ज्याचे सरकारने स्पष्टपणे खंडन केले. विरोधक मात्र या मुद्द्यावरून पंतप्रधान मोदींवर दबाव टाकत असून त्यांच्याकडून संसदेत थेट स्पष्टीकरणाची मागणी केली आहे.
दरम्यान, सरकारने या चर्चेची तयारी आक्रमक पद्धतीने सुरू केली आहे. संरक्षण मंत्री राजनाथ सिंह यांनी सीडीएस जनरल अनिल चौहान, संरक्षण सचिव आणि तिन्ही दलप्रमुखांबरोबर अनेक बैठकांचे आयोजन करून चर्चेच्या उत्तरांचे ठोस रूप निश्चित केले आहे. कारगिल विजय दिवसाच्या दोन दिवसांनंतर होणारी ही चर्चा देशाच्या सुरक्षेविषयी गंभीर राजकीय व सामाजिक दिशा ठरवू शकते, असे मानले जात आहे.
विरोधकांनी पहलगाम दहशतवादी हल्ला, बिहारमधील मतदार याद्यांच्या फेरतपासणीवरही चर्चा करण्याची मागणी केली आहे. बिझनेस अॅडव्हायजरी कमिटीच्या आठवड्याला बैठक घेण्याची मागणीही जोर धरू लागली आहे.
