अकोला न्यूज नेटवर्क
मुंबई | विधानभवनात अधिवेशन सुरू असताना कृषीमंत्री माणिकराव कोकाटे यांचा एक व्हिडीओ समाजमाध्यमांवर मोठ्या प्रमाणावर व्हायरल झाला आहे. या व्हिडीओत कोकाटे ऑनलाइन पत्त्यांचा खेळ (रमी) मोबाईलवर खेळत असल्याचा आरोप करण्यात येत आहे. या व्हिडीओवरून विरोधकांनी कोकाटेंच्या राजीनाम्याची मागणी केली असून, उपमुख्यमंत्री देवेंद्र फडणवीस यांनीही नाराजी व्यक्त केली आहे.
या पार्श्वभूमीवर कोकाटे यांनी आज पत्रकार परिषद घेऊन स्वतःची भूमिका स्पष्ट केली. ते म्हणाले, “मी रमी खेळत नव्हतो. माझा फोन नवीन आहे. मी फक्त फोन सुरू केला, तेवढ्यात त्या फोनवर गेम सुरू झाला. मला गेम स्किप करता आला नाही. आणि नेमकी त्याच वेळी कोणीतरी व्हिडीओ शूट केला.” कोकाटे यांनी स्पष्ट शब्दांत राजीनामा देण्याचा कोणताही विचार नसल्याचेही सांगितले.
विरोधकांकडून कोकाटे यांच्यावर निशाणा साधण्यात येत आहे. राष्ट्रवादी काँग्रेसचे प्रदेशाध्यक्ष सुनील तटकरे यांनीसुद्धा कोकाटे यांच्या राजीनाम्याचे संकेत दिले होते. तर काही समाजमाध्यमांवरील पोस्ट्समध्ये हा प्रकार लोकप्रतिनिधींच्या जबाबदारीशी विसंगत असल्याची टीका होत आहे.
राजकीय वर्तुळात चर्चेचा विषय ठरलेल्या या व्हिडीओवर आता खुद्द कोकाटे यांनी स्पष्टीकरण दिल्याने प्रकरण थोडक्यात निवळल्याचे दिसत असले, तरी विरोधकांचा दबाव कायम आहे. सभागृहातील शिस्त, मंत्र्यांची जबाबदारी आणि समाजमाध्यमांवरून होणाऱ्या परिणामांच्या पार्श्वभूमीवर हा मुद्दा केवळ व्यक्तीपुरता मर्यादित न राहता, संस्थात्मक शिस्तीचाही विषय ठरत असल्याचे राजकीय निरीक्षकांचे म्हणणे आहे.
