अकोला न्यूज नेटवर्क
नवी दिल्ली | देशाच्या गुप्तचर विभागात काम करण्याची इच्छा असलेल्या पदवीधर तरुणांसाठी मोठी भरती जाहीर झाली आहे. केंद्रीय गृह मंत्रालयाच्या अधिपत्याखालील इंटेलिजन्स ब्युरो (IB) विभागाने असिस्टंट सेंट्रल इंटेलिजन्स ऑफिसर (ACIO) ग्रेड-II/एक्झिक्युटिव्ह पदांसाठी तब्बल ३७१७ जागांसाठी भरती प्रक्रिया सुरू केली आहे. या पदांसाठी ऑनलाइन अर्ज प्रक्रिया आजपासून, म्हणजे १९ जुलै २०२५ पासून सुरू झाली असून इच्छुक उमेदवारांना १० ऑगस्ट २०२५ पर्यंत अर्ज करण्याची संधी आहे.
सरकारी नोकरीच्या शोधात असलेल्या पदवीधरांसाठी ही सुवर्णसंधी मानली जात असून, देशाच्या सुरक्षेशी निगडित असलेल्या IB मध्ये काम करण्याची संधी मिळणे ही प्रतिष्ठेची बाब मानली जाते.
भरती प्रक्रियेतील जागांचे वर्गीकरण पुढीलप्रमाणे आहे : सर्वसाधारण प्रवर्गातील १५३७ जागा, EWS साठी ४४२, OBC साठी ९४६, अनुसूचित जातींसाठी ५६६ व अनुसूचित जमातींसाठी २२६ जागा उपलब्ध आहेत. यामुळे विविध सामाजिक घटकांना संधी मिळावी याची काळजी घेतली गेली आहे.
या भरतीसाठी अर्ज करण्यासाठी उमेदवार कोणत्याही मान्यताप्राप्त विद्यापीठातून पदवीधर असावा. सोबतच, संगणकाचे मूलभूत ज्ञान असणे अनिवार्य आहे. वयोमर्यादा १८ ते २७ वर्षे असून, आरक्षित प्रवर्गातील उमेदवारांना शासन नियमानुसार सवलत दिली जाणार आहे.
अर्ज शुल्काची बाब विचारात घेतल्यास, OPEN, EWS व OBC प्रवर्गातील पुरुष उमेदवारांसाठी शुल्क ६५० रुपये आहे, तर SC, ST, महिला व इतर सर्व उमेदवारांसाठी ५५० रुपये आकारण्यात येणार आहेत.
उमेदवारांची निवड तीन टप्प्यांमधून केली जाईल. पहिल्या टप्प्यात वस्तुनिष्ठ चाचणी (Objective Type) १०० गुणांची असून त्यासाठी ६० मिनिटांचा कालावधी दिला जाईल. दुसऱ्या टप्प्यात वर्णनात्मक परीक्षा (Descriptive Test) ५० गुणांची आहे. यात निबंध लेखन व इंग्रजी आकलन यांचा समावेश आहे. अंतिम टप्प्यात १०० गुणांची मुलाखत घेतली जाईल.
अर्ज करण्याची प्रक्रिया पूर्णपणे ऑनलाइन आहे. इच्छुकांनी mha.gov.in या गृह मंत्रालयाच्या अधिकृत संकेतस्थळावर जाऊन अर्ज करावा. आधी नोंदणी करून, लॉगिन करत अर्ज पूर्ण करावा, आवश्यक कागदपत्रे अपलोड करावीत व शुल्क भरून अर्ज सबमिट करावा. भविष्यातील उपयोगासाठी अर्जाची प्रत साठवून ठेवण्याचा सल्ला देण्यात आला आहे.
देशाच्या अंतर्गत सुरक्षेत योगदान देण्याची आणि जबाबदारीने कार्य करण्याची संधी शोधणाऱ्या तरुणांसाठी ही भरती अत्यंत महत्त्वाची ठरणार आहे. भरती प्रक्रियेसाठी तयारी करताना अभ्यासक्रम आणि परीक्षेचे स्वरूप नीट समजून घेणे गरजेचे आहे. अर्ज प्रक्रियेतील तारखा, अटी व शर्ती यांचा नीट विचार करूनच अर्ज करण्याचे आवाहन करण्यात आले आहे.
