अकोला न्युज नेटवर्क दिनांक २६ फेब्रुवारी २०२४ :- सुप्रसिद्ध भारतीय गझल गायक पंकज उधास यांचं नुकतंच निधन झालं आहे. त्यांनी संगीत जगतात महत्त्वपूर्ण योगदान दिलं आहे. त्यांच्या अशा मृत्युमुळे संगीतप्रेमींमध्ये आणि सिनेजगतात शोककळा पसरली आहे. ते गेल्या काही दिवसांपासून आजारी होते. दहा दिवसांपूर्वी त्यांना दवाखान्यात भरती करण्यात आलं होतं. आज सकाळी अकराच्या सुमारास त्यांचं निधन झालं असल्याचं त्यांच्या पीआर टीमने एका सोशल मीडिया पोस्टमध्ये म्हटलंय. आपण आता त्यांच्या कारकिर्दीवर एक नजर टाकणार आहोत.
पंकज उधास यांचा जन्म 17 मे 1951 रोजी गुजरातमधील जेतपूरमध्ये जाला. ते संगीताची पार्श्वभूमी असलेल्या कुटुंबातूनच आले होते. त्यामुळेच, त्यांना संगीताची इतकी सखोल जाण होती. त्यांचे वडील हे प्रसिद्ध शास्त्रीय संगीतकार होते. पंकज उधास यांनी 1970 च्या दशकात त्यांच्या संगीत कारकिर्दीला सुरुवात केली होती. सुरुवातीला इंडस्ट्रीमध्ये स्वत:ला प्रस्थापित करण्यासाठी त्यांनी बराच संघर्ष केला. त्यांनी विविध मैफिली आणि संमेलनांमध्ये सादरीकरण केलं. हळूहळू त्यांच्या मधूर आणि भावपूर्ण आवाजामुळे आणि गझल शैलीतील प्रभुत्वामुळे त्यांची म्हणून अशी एक ओळख निर्माण होत गेली.
केव्हा मिळाली प्रसिद्धी?
1980 च्या दशकाच्या सुरुवातीस, पंकज उधास यांनी त्यांच्या “आहट” अल्बमच्या रिलीजनंतर खऱ्या अर्थाने व्यापक प्रसिद्धी मिळवली. याच अल्बममध्ये “चिठी आयी है” आणि “और आहिस्ता” यांसारख्या हिट गझलांचा समावेश होता. या अल्बमने प्रचंड यश मिळवले आणि त्यामुळेच ते स्टारडमपर्यंत पोहोचले. “आहट”च्या यशानंतर पंकज उधास यांनी “मुकरार” (1981), “तरन्नम” (1982), आणि “मिट्टी” (1983) यासह हिट अल्बमची मालिकाच रिलीज केली. त्यांच्या गझल आणि रोमँटिक बॅलड्सच्या भावपूर्ण सादरीकरणामुळे त्यांना प्रचंड चाहते मिळत गेले आणि समीक्षकांनाही त्यांचं गाणं आवडू लागलं.
पंकज उधास यांनी त्यांच्या संपूर्ण कारकिर्दीत जगजीत सिंग, आनंद बक्षी आणि गुलजार यांच्यासह अनेक नामवंत संगीतकार आणि गीतकारांसोबत काम केलं आहे. त्यांनी जगभरातील असंख्य मैफिली आणि संगीत महोत्सवांमध्ये सादरीकरण केलं आहे. आपल्या मधुर आवाजाने आणि भावनिक गायकीने त्यांनी प्रेक्षकांना मोहित केलं आहे. त्यांच्या मृत्युमुळे आज संगीत क्षेत्रात एक मोठी पोकळी निर्माण झाल्याची भावना चाहत्यांमध्ये निर्माण झाली आहे.
