अकोला न्यूज नेटवर्क ब्युरो
मुंबई | सन २०२३-२४ मध्ये राज्यातील एकूण मत्स्योत्पादन ४ लाख ३४ हजार ५७५ टन इतकं होतं. चालू वर्षात हेच उत्पादन वाढून ४ लाख ६३ हजार ७५८ टनांवर पोहोचले. म्हणजेच २९ हजार १८४ टनांची वाढ झाली. ही वाढ गेल्या सहा वर्षांतील सर्वात जास्त असल्याचं मत्स्यव्यवसाय विभागाने सांगितलं आहे. मागील हंगामात हवामानाच्या प्रतिकूलतेमुळे उत्पादनात घट झाली होती, मात्र यंदा हवामानाने साथ दिल्याने मासेमारीला पुन्हा गती मिळाली आहे.
कोकण किनारपट्टीत सर्वाधिक वाढ
कोकणातील सातही जिल्ह्यांमध्ये मत्स्य उत्पादनात लक्षणीय वाढ झाली आहे. ठाणे जिल्ह्यात गतवर्षीच्या तुलनेत तब्बल दुपटीने म्हणजेच २६ हजार टनांवरून ५४ हजार ४५७ टनांपर्यंत उत्पादन वाढले आहे. मुंबई उपनगर, बृहन्मुंबई, रायगड, रत्नागिरी, सिंधुदुर्ग आणि पालघर जिल्ह्यांमध्येही साधारणतः १ ते २ हजार टनांची वाढ नोंदवली गेली आहे. मुंबई शहरात सर्वाधिक १ लाख ७३ हजार टन मासेमारी झाली आहे.
घुसखोरी आणि अवैध मासेमारीवर नियंत्रण
मत्स्योत्पादन वाढीचे एक महत्त्वाचे कारण म्हणजे परप्रांतीय बोटींना राज्याच्या सागरी हद्दीत होणारी घुसखोरी प्रभावीपणे रोखण्यात आलेली आहे. पर्ससीन आणि एलईडी मासेमारीवर प्रभावी निर्बंध आणल्यामुळे स्थानिक मच्छीमारांना चांगला नफा मिळाल्याचं दिसून आलं आहे. नियमबाह्य मासेमारीवर नियंत्रण आल्याने पर्यावरणीय संतुलनही काही प्रमाणात राखले गेले आहे.
हवामानाची साथ आणि व्यवसायाला दिलासा
गेल्या काही वर्षांपासून मच्छीमारांना निसर्ग आपत्ती, कोरोना टाळेबंदी आणि हवामानातील अनियमिततेमुळे मोठे नुकसान सहन करावे लागले होते. मात्र यंदा हवामान पुरक ठरल्याने मासेमारीचे दिवस पुन्हा बहारदार झाले आहेत. समुद्रात जाण्याच्या दिवसांमध्ये सातत्य मिळाल्याने बोटींची फेऱ्याही वाढल्या.
सांख्यिकीय तपशील आणि उत्पादन वितरण
राज्याच्या मत्स्योत्पादनाचे आकडेवारीनुसार सर्वाधिक उत्पादन बृहन्मुंबईत नोंदवले गेले (१ लाख ७३ हजार टन), तर त्यानंतर मुंबई उपनगर (७५ हजार टन), रत्नागिरी (७१ हजार टन), ठाणे (५४ हजार टन), रायगड (३५ हजार टन), पालघर (३१ हजार टन) आणि सिंधुदुर्ग (२३ हजार टन) या क्रमाने जिल्ह्यांचा वाटा आहे. ही आकडेवारी राज्यातील मत्स्य व्यवसायाच्या पुनरुज्जीवनाचा स्पष्ट पुरावा देणारी ठरत आहे.
