अकोला न्यूज नेटवर्क ब्युरो
मुंबई | हिंदी टेलिव्हिजन आणि चित्रपटसृष्टीत आध्यात्मिक आणि सामाजिक कथानकांच्या माध्यमातून विशेष ओळख निर्माण करणारे ज्येष्ठ अभिनेते, निर्माता-दिग्दर्शक धीरज कुमार यांचं आज वयाच्या ७९व्या वर्षी निधन झालं. गेल्या काही दिवसांपासून त्यांच्यावर कोकिलाबेन धीरूभाई अंबानी रुग्णालयात उपचार सुरू होते. १२ जुलैपासून त्यांना न्यूमोनियामुळे व्हेंटिलेटरवर ठेवण्यात आलं होतं. अखेर १५ जुलै रोजी सकाळी ११.४० वाजता त्यांना हृदयविकाराचा झटका आला आणि त्यांनी अखेरचा श्वास घेतला.
शेवटच्या क्षणी कुटुंबाचा साथ
त्यांच्या निधनाच्या वेळी त्यांचा मुलगा आशुतोष कुमार रुग्णालयात त्यांच्या सोबत होता. कुटुंबियांनी अधिकृतपणे त्यांच्या निधनाची माहिती दिली आहे. त्यांच्या जाण्याने संपूर्ण टीव्ही व फिल्म इंडस्ट्रीत शोककळा पसरली आहे.
चित्रपटसृष्टीतून टीव्हीपर्यंतचा प्रवास
१९६५ मध्ये आपल्या कारकिर्दीची सुरुवात करणाऱ्या धीरज कुमार यांनी सुरुवातीला अभिनेता म्हणून काम करत अनेक चित्रपटात महत्त्वपूर्ण भूमिका साकारल्या. ‘रोटी कपडा और मकान’, ‘स्वामी’, ‘क्रांती’, ‘सर्गम’, ‘मान भरों सजना’ यांसारख्या सिनेमांमधून त्यांनी अभिनय कौशल्य सिद्ध केलं. त्यांनी जवळपास २१ पंजाबी चित्रपटांमध्येही काम केलं होतं, ज्यात ‘सज्जन सिंह रंगरूट’, ‘इक संधू हुंदा सी’, ‘माझैल’, ‘वॉर्निंग २’ यांचा समावेश होता.
‘ओम नमः शिवाय’मधील धार्मिक संस्कार
धीरज कुमार यांचं खरं यश आलं ते टेलिव्हिजनच्या क्षेत्रात. त्यांच्या ‘क्रिएटिव्ह आय’ या प्रॉडक्शन कंपनीमार्फत त्यांनी ‘ओम नमः शिवाय’, ‘अदालत’, ‘साईबाबा’, ‘महिमा शनि देव की’ यांसारख्या धार्मिक व आध्यात्मिक मालिकांची निर्मिती केली. ‘ओम नमः शिवाय’ ही मालिका १९९७ मध्ये प्रसारित झाली होती आणि तिचं संपूर्ण भारतात मोठ्या प्रमाणावर स्वागत झालं. अनेक प्रेक्षकांच्या श्रद्धेचा भाग बनलेली ही मालिका आजही आठवली जाते.
शोकसंवेदना आणि श्रद्धांजली
चित्रपट निर्माता अशोक पंडित यांनी त्यांच्या निधनाबद्दल दु:ख व्यक्त करत सोशल मीडियावर फोटो शेअर करत लिहिलं – “खूप दु:ख झालं हे ऐकून की प्रसिद्ध अभिनेते, निर्माते धीरज कुमार आपल्यामध्ये नाहीत. ओम शांती.”
टीव्हीवरील ‘दिग्दर्शकीय देव’ हरपला
धीरज कुमार यांनी आपल्या संपूर्ण कारकीर्दीत पारंपरिक भारतीय मूल्यांना आणि धार्मिकतेला टीव्ही माध्यमातून व्यापक स्वरूप दिलं. त्यांची निर्मिती असलेली बहुतांश मालिका उच्च दर्जाच्या सादरीकरणासाठी ओळखल्या जात. त्यांच्या जाण्याने टीव्ही जगताला मोठा सांस्कृतिक आणि दिग्दर्शकीय तोटा झालाय, असं मानलं जातं.
