अकोला न्यूज नेटवर्क ब्युरो
लखनऊ | उत्तर प्रदेशातील लखनऊच्या कृष्णानगर भागात पोलिसांनी मानवी तस्करी करणाऱ्या मोठ्या रॅकेटचा पर्दाफाश केला आहे. तब्बल १२ वर्षांपासून मुलींना लग्न आणि अनैतिक हेतूसाठी विकणाऱ्या टोळीवर अखेर पोलिसांनी कारवाई केली. या टोळीने १५ पेक्षा अधिक मुलींची विक्री केल्याचे समोर आले असून यात मुख्यमंत्र्यांच्या सुरक्षेसाठी नियुक्त पीएसओच्या १६ वर्षीय मुलीलाही गंडवण्यात आले. ही घटना उघडकीस आल्याने राज्यात एकच खळबळ उडाली आहे.
🕵️ एकट्या मुलींना बनवत होते टार्गेट
गर्दीच्या ठिकाणी एकट्या फिरणाऱ्या किंवा घरातून पळून आलेल्या मुली हे या रॅकेटचं मुख्य लक्ष्य होतं. चारबाग रेल्वे स्थानक, आलमबाग बस स्थानक आदी ठिकाणी मुलींवर नजर ठेवून, भावनिक किंवा धार्मिक कारणे सांगून त्या आपल्या जाळ्यात ओढल्या जात होत्या. आरोपी संतोष साहू (मूळगाव सहडोल, मध्य प्रदेश) व मनीष भंडारी (साकेतनगर, राजस्थान) हे या गुन्ह्याचे मुख्य सूत्रधार होते.
👧 सीएम पीएसओच्या मुलीची हृदयद्रावक कहाणी
२८ जून रोजी मुख्यमंत्री सुरक्षाधिकार्‍याच्या १६ वर्षीय मुलीने आपल्या वडिलांना “पप्पा, मला शोधू नका. मी देवाजवळ जात आहे” असा व्हॉईस मॅसेज पाठवला. घरातून निघताना तिने भगवान विष्णू व लक्ष्मी देवीच्या मूर्तीही बरोबर घेतल्या. कृष्णानगर पोलिस ठाण्यात ३० जून रोजी हरवल्याची तक्रार दाखल झाली.
पोलिसांनी तपास सुरू केला असता, संतोषने तिच्या धार्मिक भावनांचा गैरफायदा घेत तिचा मथुरा दर्शनाच्या बहाण्याने अपहरण केला. पण तो तिला प्रयागराज येथील घरी घेऊन गेला आणि तिथे मनीषकडे ५० हजार रुपयांना विकले. परंतु मुलगी रडू लागल्याने मनीषने ती परत दिली आणि ४५ हजार रुपये परत घेतले.
🚓 पोलिसांची सतर्कता : टोळीच्या मुसक्या आवळल्या
पोलिसांनी सहा पथके तयार करून शोधमोहीम सुरू केली. ८ जुलै रोजी पीएसओची मुलगी सुखरूप सापडली, आणि तिच्या कबुलीनंतर संतोष व मनीषला अटक करण्यात आली. संतोषकडून रायबरेलीतील आणखी एका अल्पवयीन मुलीची सुटका करण्यात आली. तिच्या नातेवाईकांना कळविण्यात आले आहे.
🌐 मोठे नेटवर्क, राजस्थानात सर्वाधिक विक्री
या टोळीचं जाळं उत्तर प्रदेश, मध्य प्रदेश, छत्तीसगड, झारखंड आणि राजस्थानात पसरलेलं असून सर्वाधिक मुली राजस्थानात विकल्या गेल्या. एका मुलीची २.७५ लाख रुपये किंमत ठरली होती. संतोष तिसरी पास, तर मनीष आठवीपर्यंत शिकलेला असून ट्रॅव्हल्समध्ये गाडी चालवतो. पोलिसांच्या माहितीनुसार, दोघांनी पूर्वीही जेलवास भोगला असून संतोषवर २५ हजारांचे बक्षीसही जाहीर होते.
🔎 एफआयआर नोंद आणि तपास
संतोषवर लखनऊ, प्रयागराज, वाराणसी, छत्तीसगड आणि प्रतापगड येथे सहा एफआयआर आहेत. पोलिसांचे म्हणणे आहे की, तो गुन्हा उघडकीस येण्याआधी मोबाईल नंबर बदलायचा, त्यामुळे पोलिसांना पकडणे अवघड जात होते. या प्रकरणाच्या अधिक तपासासाठी अजून काही आरोपींचा शोध सुरू आहे.
❗ एकट्या मुलींसाठी इशारा
या प्रकारानंतर पोलीस आणि समाजसेवी संस्था पालकांना इशारा देत आहेत, की मुलींना एकटं न सोडावं, घरातून निघताना नेमकी माहिती असावी आणि भावनिक अवस्थेत असलेल्या मुलांवर सतत लक्ष ठेवावं.
या घटनेने राज्यातील मानवी तस्करीच्या वाढत्या घटनांवर पुन्हा एकदा गंभीर प्रश्न उपस्थित केला आहे. पोलिसांची तत्परता आणि कार्यक्षम कारवाईमुळे दोन अल्पवयीन मुलींच्या जीवाला दिलासा मिळाला, पण अजून अशा कितीतरी निष्पाप मुली या टोळीच्या विळख्यात सापडल्या असण्याची शक्यता वर्तवली जात आहे.
