अकोला न्यूज नेटवर्क ब्यूरो
भोकरदन | जालना – एकीकडे सरकारी रुग्णालयांत मातृ-मुल आरोग्य सेवा सुधारण्यासाठी कोट्यवधींच्या योजना राबविल्या जात आहेत, तर दुसरीकडे प्रत्यक्ष सेवेतील हलगर्जीपणा जीवघेणा ठरू शकतो, हे भोकरदन येथे घडलेल्या एका धक्कादायक प्रकारावरून पुन्हा अधोरेखित झाले आहे. अल्ट्रासाऊंडसाठी वापरण्यात येणाऱ्या जेलऐवजी ॲसिडसदृश द्रव ‘हायपोक्लोराईट’ वापरल्याने एका गर्भवती महिलेला गंभीर भाजल्याचे प्रकार उघडकीस आले असून, उपचारांदरम्यान तिची प्रसूती सुखरूप पार पडली आहे.
सकाळी सात वाजता घडलेला दुर्दैवी प्रकार
शुक्रवार, २७ जून रोजी सकाळी ७ वाजण्याच्या सुमारास भोकरदन येथील ग्रामीण रुग्णालयात ही घटना घडली. खापरखेडा येथील शीला संदीप भालेराव (वय २८) या गर्भवती महिलेला प्रसूतीसाठी दाखल करण्यात आले होते. प्रसूतीपूर्वी गर्भातील बाळाच्या हृदयाचे ठोके तपासण्याची प्रक्रिया सुरू होती. याचवेळी अल्ट्रासाऊंडसाठी आवश्यक असलेला जेल लावण्याऐवजी हायपोक्लोराईट नावाचा रसायन पोटावर लावण्यात आले. त्यामुळं महिलेच्या त्वचेवर जोरदार प्रतिक्रिया उमटली, तिचे पोट होरपळले आणि ती वेदनेने विव्हळली.
होरपळलेले पोट, पण बाळ सुखरूप
दुर्दैवी प्रसंग घडल्यानंतर अवघ्या तासाभरात – सकाळी आठच्या सुमारास – शीला भालेराव यांनी एका गोंडस बाळाला जन्म दिला. डॉक्टर आणि परिचारिकांनी प्रसंगावधान राखत तात्काळ उपचार केले आणि प्रसूती सुखरूप पार पाडली. या घटनेमुळे शीला यांचे पोट जळाल्याचे डॉक्टरांनी स्पष्ट केले असून, सध्या त्या व त्यांच्या बाळाची प्रकृती स्थिर असल्याचेही कळते. डॉ. दीपक सोनी यांनी घटनेची पुष्टी केली आहे.
हायपोक्लोराईट म्हणजे काय?
हायपोक्लोराईट हे एक संडास, फरश्या, गंजलेल्या लोखंडी वस्तू, रक्ताचे डाग किंवा बॅक्टेरिया साफ करण्यासाठी वापरले जाणारे निर्जंतुक रसायन आहे. हे त्वचेसाठी अतिशय घातक असून त्याचा मानवी शरीराच्या नाजूक भागावर संपर्क झाल्यास गंभीर त्वचारोग निर्माण होऊ शकतात. विशेषतः गरोदर स्त्रीच्या पोटावर हे लावल्यास गंभीर अपाय होण्याची शक्यता वाढते. त्यामुळे अशा प्रकारच्या रसायनांबाबत विलक्षण काळजी घेणे अत्यावश्यक असते.
चुकीने की दुर्लक्षाने? चौकशी सुरू
घटनेनंतर महिलेच्या नातेवाईकांनी रुग्णालय प्रशासनावर संताप व्यक्त केला. प्रश्न उपस्थित केला जातोय की, औषधी ट्रेमध्ये अल्ट्रासाऊंड जेलऐवजी हायपोक्लोराईट कसे काय ठेवले गेले? रुग्णसेवेतील एक मूलभूत आणि महत्त्वाचा तपशील इतक्या बेफिकिरीने हाताळला गेला का? यासंदर्भात सध्या रुग्णालय पातळीवर अंतर्गत चौकशी सुरू आहे. संबंधित कर्मचारी, परिचारिका व डॉक्टरांची जबाबदारी यामध्ये निश्‍चित केली जाणार असल्याचे कळते.
आरोग्य विभागाची प्रतिक्रिया
या घटनेची माहिती मिळताच जिल्हा शल्यचिकित्सक डॉ. राजेंद्र पाटील यांनी तत्काळ चौकशीचे आदेश दिले आहेत. “भोकरदन येथील प्रकाराची चौकशी करण्याबाबत संबंधित अधिकाऱ्यांना सूचना दिल्या आहेत. चौकशी अहवाल प्राप्त झाल्यानंतर दोषींवर नियमानुसार कारवाई केली जाईल,” असं त्यांनी स्पष्ट केलं आहे.
सार्वजनिक रुग्णसेवेवर प्रश्नचिन्ह
ही घटना केवळ एका महिलेला झालेली शारीरिक इजा एवढ्यावर थांबत नाही. सरकारी रुग्णालयातील उपचारांबाबतचा विश्वास पुन्हा एकदा डळमळीत होतोय. नोंदणीपासून तपासणीपर्यंत प्रत्येक टप्प्यावर दक्षता बाळगली गेली पाहिजे. मात्र या घटनेत तीच अनुपस्थित असल्याचं स्पष्ट दिसतंय. महिलांच्या आरोग्यविषयक योजनांवर मोठ्या प्रमाणात निधी खर्च होतो, पण प्रत्यक्षात सेवा देणाऱ्या यंत्रणांच्या बेपर्वाईमुळे सामान्य नागरिकांना जीवघेणा फटका बसतो.
सुदैवाची गोष्ट – आई आणि बाळ सुखरूप
या प्रकारानंतर संपूर्ण तालुक्यात खळबळ उडाली असून अनेक सामाजिक संघटनांनी रुग्णालय प्रशासनाच्या कार्यप्रणालीवर प्रश्न उपस्थित केले आहेत. सुदैवाने आई आणि बाळ दोघेही सुखरूप आहेत. पण प्रशासनाने वेळेवर दक्षता घेतली नसती, तर हे प्रकरण अधिक गंभीर व त्रासदायक ठरले असते.
वाढते अपघात आणि गरज जागरूकतेची
आरोग्य व्यवस्थेतील यंत्रणा योग्यरित्या कार्यरत राहण्यासाठी केवळ नवीन सुविधा आणि इमारती पुरेशा नाहीत. सेवा देणाऱ्यांची समज, प्रशिक्षण आणि जबाबदारी ही तितकीच महत्त्वाची बाब आहे. भोकरदनच्या घटनेतून हे स्पष्ट होते की, किरकोळ वाटणारी चूकही आयुष्यभर पुरणारी जखम ठरू शकते.
