अकोला न्यूज नेटवर्क ब्यूरो
नवी दिल्ली : पाकिस्तान सातत्याने नकार देत असले तरी दाऊद इब्राहिम पाकिस्तानातच असल्याचे पुरावे पुन्हा समोर आले आहेत. भारताच्या माजी महिला राजदूत रुची घनश्याम यांनी स्पष्ट सांगितले की, कराचीत दाऊदची वास्तव्यात घरे आहेत. ही माहिती त्यांनी NDTV च्या ‘क्रिएटर्स मंच’मध्ये दिली.
रुची घनश्याम म्हणाल्या, “कराचीत कोणीही साधा माणूससुद्धा सांगू शकतो की दाऊद कुठे राहतो. आमच्या ड्रायव्हरने म्हटलं होतं – आधी बेनझीर भुत्तोंचं घर लागतं, आणि थोडं पुढे गेलं की दाऊदचं.”
त्या म्हणाल्या की, सुरुवातीला हे ऐकून आश्चर्य वाटलं. पण नंतर लक्षात आलं की पाकिस्तानसारख्या देशासाठी हे काही नवीन नाही. खोटं लपवणं ही त्यांची पद्धतच आहे.
दाऊद इब्राहिम – भारताचा मोस्ट वाँटेड गुन्हेगार
1993 मध्ये मुंबईत झालेल्या बाँबस्फोटांच्या मालिकेत 257 लोकांचा मृत्यू झाला आणि 700 पेक्षा जास्त लोक जखमी झाले. या भीषण हल्ल्यामागे दाऊद इब्राहिमचा हात असल्याचे स्पष्ट झाले.
तेव्हापासून तो भारतासाठी मोस्ट वाँटेड गुन्हेगार ठरला. त्याने आंतरराष्ट्रीय गुन्हेगारी सिंडिकेट उभं केलं, ज्यामध्ये ड्रग्स तस्करी, खंडणी, मनी लॉन्डरिंग आणि दहशतवादाला आर्थिक मदत यांचा समावेश आहे.
अमेरिका आणि भारतानेही त्याच्यावर अल-कायदा, लष्कर-ए-तोयबा यांसारख्या संघटनांना निधी पुरवल्याचा आरोप केला आहे.
2020 मध्ये पाकिस्तानची चुकून कबुली
भारताकडे असलेल्या पुराव्यांनुसार, दाऊद सध्या कराचीत वास्तव्यास आहे. 2020 मध्ये FATF च्या दबावामुळे पाकिस्तान सरकारने दहशतवाद्यांवर निर्बंध टाकताना दाऊदच्या मालमत्तांचे ठिकाण जाहीर केले.
या यादीत “व्हाईट हाऊस, साऊदी मशिदीजवळ, क्लिफ्टन” हे ठिकाण नमूद होते. त्याचबरोबर “हाऊस नंबर 37, 30 वी स्ट्रीट, डिफेन्स हाऊसिंग अथॉरिटी, कराची” व “नूराबादच्या डोंगराळ भागातील एक आलिशान बंगला” अशी अन्य ठिकाणंही नमूद करण्यात आली होती.
मात्र काही दिवसांतच पाकिस्तान सरकारने आपली भूमिका बदलत ही माहिती अधिकृत नव्हती, असे सांगून पल्ला झटकला.
FATF चा दबाव आणि पाकिस्तानचा दुटप्पीपणा
रुची घनश्याम यांनी स्पष्ट केलं की जेव्हा पाकिस्तानवर FATF (Financial Action Task Force) चा दबाव वाढला, तेव्हा त्यांनीच दाऊदबाबत माहिती दिली. पण भारत-पाक चर्चांदरम्यान हीच माहिती पाकिस्तान नाकारतो.
त्यांच्या मते, FATF च्या ग्रे लिस्टमधून बाहेर पडण्यासाठी पाकिस्तानने हे कबूल केलं होतं. पण भारताला न्याय मिळवून देण्यासाठी अशा कबुल्यांचा आंतरराष्ट्रीय पातळीवर उपयोग होणं आवश्यक आहे.
ही माहिती फक्त राजकारणापुरती नाही
दाऊदच्या उपस्थितीची ही माहिती केवळ राजकीय चर्चेची बाब नाही. ती भारताच्या राष्ट्रीय सुरक्षेशी आणि आंतरराष्ट्रीय दहशतवादविरोधी यंत्रणांशी संबंधित गंभीर बाब आहे.
या प्रकरणात सतत बदलती भूमिका स्वीकारून पाकिस्तानने पुन्हा एकदा आपला दुटप्पी चेहरा जगासमोर मांडला आहे. त्यामुळे भारताने आंतरराष्ट्रीय स्तरावर या गोष्टींना पुढे नेऊन कडक कारवाईची मागणी करणे गरजेचे आहे.
