अकोला न्यूज नेटवर्क ब्युरो
अकोला : गेल्या महिन्याभरात राज्यात मान्सूनचा जोर चांगलाच वाढला असून, महाराष्ट्रातील बहुतांश भागात समाधानकारक पाऊस झाला आहे. परिणामी, अनेक धरणांत भरपूर जलसाठा झाला आहे. परंतु, विदर्भ मात्र या पावसाने अजूनही ‘हुलकावणी’ दिली आहे. त्यामुळे शेती, पिण्याच्या पाण्याचा प्रश्न, व तापमानाचा त्रास, अशा तिहेरी संकटाला सामोरे जावे लागत आहे.
राज्यातील पावसाचा आढावा
सध्या राज्यातील सुमारे ९५ टक्के भागात पावसामुळे धरणांमध्ये समाधानकारक पाणीसाठा झाला आहे. पुणे विभागातील धरणांमध्ये सध्या ३७ टक्के पाणीसाठा आहे. कोकणातील धरणांमध्ये ४४ टक्के, नाशिकमध्ये ४० टक्के, अमरावतीत ३७ टक्के, तर मराठवाड्यात ३६ टक्के जलसाठा नोंदवला गेला आहे.
परंतु नागपूर विभागात केवळ ३० टक्के पाणीसाठा असून, हा आकडा सर्वात कमी आहे. नाशिकमधील काही धरणांतून विसर्ग सुरू झाल्याने जायकवाडी धरणाची पातळी ३१ टक्क्यांवर पोहोचली आहे.
पश्चिम महाराष्ट्रात धरणे फुलू लागली!
कोकणातील कोयना, कृष्णा आणि पंचगंगा नद्या दुथडी भरून वाहत असून, धोम, तारळी, कोयना, कन्हेर, उरमोडी आणि वीर ही धरणे भरू लागली आहेत. सोलापूरच्या उजनी धरणात गेल्या महिन्यात ४० टक्क्यांपेक्षा अधिक साठा झाला असून, सध्या ते ७३ टक्क्यांवर आहे.
पुण्याच्या खडकवासला धरणात ६४ टक्के आणि घोड धरणात ८० टक्के पाणीसाठा झाला आहे. कोल्हापुरातील पंचगंगा नदीच्या पातळीत एकाच दिवशी अडीच फूट वाढ झाली असून, १९ बंधारे पाण्याखाली गेले आहेत. त्यामुळे काही भागात वाहतूक विस्कळीत झाली आहे.
मराठवाड्यात सुधारणा, पण अद्याप अपुरी
मराठवाड्यातील काही प्रमुख धरणांमध्ये साठा झाल्याचे चित्र आहे. मांजरा धरणात २७ टक्के, येलदरीत ५० टक्के, अमदुरात ६३ टक्के, निम्न दुधना ३७ टक्के, खुलगापूर ५३ टक्के, भुसणी २९ टक्के, शिवणी ५० टक्के आणि विष्णुपुरीत फक्त २३ टक्के पाणीसाठा झाला आहे.
विदर्भात संकट कायम – पेरण्या रखडल्या, टंचाई तीव्र
विदर्भात मात्र परिस्थिती गंभीर बनली आहे. जून महिना संपत आला असला तरी समाधानकारक पाऊस नाही. नागपूर, चंद्रपूर, गडचिरोली, भंडारा, गोंदिया या जिल्ह्यांत ८० टक्के पेरण्या रखडल्या आहेत. अनेक शेतकऱ्यांनी आशेवर पेरण्या केल्या पण आता बियाण्यांचे नुकसान होण्याची शक्यता आहे.
अकोल्यात पाणीटंचाई दिवसेंदिवस वाढत आहे. काटेपूर्णा धरणात केवळ १३.९ टक्के पाणीसाठा शिल्लक आहे. त्यामुळे प्रशासनाला खासगी विहिरींचे अधिग्रहण करावे लागत आहे. शहरात गंभीर टंचाई जाणवत आहे.
उष्णतेचा कहर अद्याप कायम
निम्मा जून संपला तरी विदर्भातील तापमान कमी होण्याचे नाव घेत नाही. शनिवारी नागपूरमध्ये कमाल तापमान ३७.८ अंश सेल्सिअस नोंदवले गेले. २४ जूनपासून जोरदार पावसाची शक्यता हवामान खात्याने वर्तवली आहे. तोच विदर्भासाठी दिलासा ठरू शकतो.
