अकोला न्यूज नेटवर्क ब्युरो दिनांक २१ जून २०२५ :- अकोल्यातील सन्मित्र हॉस्पिटलमधील सुप्रसिद्ध मानसोपचारतज्ज्ञ डॉ. प्रशांत जावरकर यांनी विषारी इंजेक्शन घेऊन आत्महत्या केल्याने वैद्यकीय वर्तुळात मोठी खळबळ उडाली आहे. आत्महत्येचं कारण अद्याप गुलदस्त्यातच.
समुपदेशन करणाऱ्या डॉक्टरचा जीवनचक्र असा संपला?
अकोल्यात मानसोपचार तज्ज्ञ म्हणून प्रसिद्ध असलेल्या डॉ. प्रशांत जावरकर यांनी स्वतःच्या राहत्या घरी विषारी इंजेक्शन घेऊन आत्महत्या केल्याची धक्कादायक घटना घडली आहे. न्यू तापडिया नगर भागातील त्यांच्या घरात त्यांनी हे टोकाचं पाऊल उचललं.
गेल्या अनेक वर्षांपासून डॉ. जावरकर हे डॉ. दीपक केळकर यांच्या सन्मित्र हॉस्पिटलमध्ये मानसिक तणावाने ग्रस्त रुग्णांचे समुपदेशन करत होते. हजारो रुग्णांना नवजीवन देणाऱ्या डॉक्टरनेच असा मृत्यू पत्करल्याने अकोल्याच्या वैद्यकीय वर्तुळासह समाजातही मोठा धक्का बसला आहे.
ही घटना गुरुवारी रात्री उशिरा घडली. कुटुंबीयांनी पोलिसांना माहिती दिल्यानंतर घटनास्थळी पोलीस दाखल झाले. प्राथमिक तपासात त्यांनी स्वतः विषारी इंजेक्शन घेऊन आत्महत्या केल्याचे समोर आले आहे. त्यांचा मृतदेह उत्तरीय तपासणीसाठी शासकीय रुग्णालयात पाठविण्यात आला असून, आत्महत्येचे नेमके कारण अद्याप स्पष्ट झालेले नाही.
वैद्यकीय वर्तुळात चिंता, तणावावर नवा प्रश्नचिन्ह
डॉ. जावरकर यांनी आत्महत्या केल्याचे वृत्त समजताच अकोल्यातील वैद्यकीय व मानसोपचार वर्तुळात प्रचंड खळबळ उडाली. जे डॉक्टर इतरांना जीवनाचा मार्ग दाखवतात, त्यांनीच असा मार्ग का निवडला? याबाबत अनेक प्रश्न निर्माण झाले आहेत.
सामाजिक व मानसोपचार तज्ज्ञांनीही या घटनेनंतर चिंता व्यक्त केली आहे. “समाजाला मानसिक आधार देणारा व्यक्ती जर स्वतःच अशा तणावात असेल, तर आपण संपूर्ण आरोग्य व्यवस्थेकडे नव्याने पाहण्याची गरज आहे,” असे मत अकोल्यातील एक ज्येष्ठ मानसोपचार तज्ज्ञ डॉ. लाड यांनी व्यक्त केले.
मानसिक तणाव, सामाजिक अपेक्षा, वैद्यकीय क्षेत्रातील प्रचंड दडपण – हे सगळं एका व्यावसायिक समुपदेशकालाही कमकुवत करू शकतं, हे या घटनेतून अधोरेखित होत आहे. मानसिक आरोग्यावर भाष्य करणाऱ्यांनाही वेळोवेळी समुपदेशनाची, आधाराची गरज असते, हे समजून घेणं समाजासाठीही अत्यंत महत्त्वाचं आहे.
मानसिक आरोग्याबाबत समाजाचा दृष्टीकोन बदलण्याची गरज
या प्रकरणात न्यू तापडिया नगर पोलिस ठाण्याने आकस्मिक मृत्यूची नोंद केली असून पुढील तपास सुरू आहे. मृत डॉक्टरच्या मोबाईलमध्ये किंवा घरातील कोणत्याही चिठ्ठीमध्ये आत्महत्येचे कारण मिळालेलं नाही. त्यामुळे त्यांच्या आत्महत्येमागे वैयक्तिक, कौटुंबिक किंवा व्यावसायिक कोणते कारण आहे, याचा तपास लावणे पोलिसांसमोरील मोठं आव्हान ठरत आहे. डॉ. जावरकर यांच्या जाण्याने अकोला शहरात मानसिक आरोग्यावर काम करणाऱ्या क्षेत्राला मोठा धक्का बसला आहे.
वाचकांसाठी प्रेरणा व सहभागाची विनंती
मानसिक तणाव, चिंता किंवा नैराश्याचा अनुभव घेत असाल, तर कृपया शांत रहा, संवाद साधा, मदतीची मागणी करा. प्रत्येक जीवन अमूल्य आहे.
आपल्याला यासंदर्भात काय वाटतं? खाली तुमची प्रतिक्रिया नोंदवा. आणखी अशाच संवेदनशील बातम्यांसाठी आमचं पोर्टल नियमितपणे वाचत राहा.
