अकोला न्यूज नेटवर्क ब्युरो
बुलढाणा: बुलढाणा हा जिल्हा काही दिवसांपूर्वी अजब आजारांमुळे चर्चेचा विषय बनला होता. काही दिवसांपूर्वी जिल्ह्यातील काही भागात लोकांच्या डोक्यावरील केस झपाट्याने गळत होते. त्यानंतर नख गळतीचा अजब प्रकार समोर आला होता.
आरोग्य विभागाने केली तपासणी
मेहकर तालुक्यातील शेलगाव देशमुख या गावातील नागरिकांच्या हातांना भेगा पडत असल्याचे समोर आले आहे. याबाबतच्या अनेक तक्रारी आरोग्य विभागाला करण्यात आल्या आहेत. ही बाब समोर येताच आरोग्य पथक शेलगाव देशमुख या गावात दाखल झाले आहे. या पथकाकडून २० रुग्णांची तपासणी करण्यात आली आहे. अनेकांवर सध्या उपचार चालू आहेत. सतत वेगवेगळे आजाराचे गंभीर प्रकार उजेडात येत असल्याने येथील नागरिक त्रस्त झाले आहेत.
आरोग्य विभागाकडून तातडीने उपचार सुरू
विशेष म्हणजे केंद्रीय आरोग्य, आयुष राज्यमंत्री प्रतापराव जाधव यांचा मतदारसंघ असलेल्या गावात हा प्रकार घडला आहे. आरोग्य पथकाकडून रुग्णांची तपासणी केली. त्यापैकी जवळपास सगळ्या रुग्णांना इसबगोल हा आजार असल्याचे दिसून आले. त्यांना हा आजार मागील १२ महिने ते ५ वर्षांपासून आहे. मागील १-२ वर्षांपासून बुलढाणा व अकोला येथील त्वचारोग तज्ज्ञांकडून रुग्णावर उपचार सुरु असल्याचे निष्पन्न झाले आहे. तर हा आजार संसर्गजन्य नसून या आजाराचा व पाण्याचा काहीही संबंध नाही. विविध प्रकारचे प्रतिजन, हानिकारक पदार्थ संपर्कात आल्यास स्वयंप्रतिकार (ऑटोइम्यून) पद्धतीचा हा आजार उद्भवू शकतो, असे डॉक्टर सांगतात.
दरम्यान, सर्व रूग्णांनी काळजी घेण्याचे आवाहन आरोग्य विभागाने केले आहे.
महाराष्ट्रातील बुलढाणा जिल्ह्यातील विविध भागांमध्ये गेल्या पाच ते सहा महिन्यांपासून विविध आजारांना लोकांना सामोरे जावे लागत आहेत. अचानक केस गळणे, टक्कल पडणे त्यापाठोपाठ बोटांची नखे गळून जाणे यांसारख्या गूढ आजाराने थैमान घातले. बुलढाणा जिल्ह्यातील खामगाव आणि शेगाव तालुक्यात सुरुवातीला या आजाराचे प्रमाण मोठ्या प्रमाणात पाहायला मिळाले. या आजारासंदर्भातील गुढ उकलण्याचे काम सुरू आहे, त्याचा रिपोर्ट देखील अजून आलेला नाही. अशातच, आता याच जिल्ह्यात आता नवीन आजाराने डोकेवरं काढले आहे. ते म्हणजे अचानक गावागावातील लोकांच्या हातांना भेगा पडू लागल्या आहेत.
या अचानक व गूढ असलेल्या आजारामुळे मात्र नागरिक भयभीत झाले आहेत. तर आरोग्य विभाग देखील सतर्क झाला आहे. खामगाव, शेगाव नंतर आता चिखली व मेहकर या तालुक्यातील गावांमध्ये देखील या आजाराचा शिरकाव झाल्याचे सांगितले जात आहे. दरम्यान, यासर्व घटनेमुळे आता बुलढाणा जिल्ह्यातील आरोग्य यंत्रणा कामाला लागली आहे.
