अकोला न्यूज नेटवर्क ब्युरो अनुराग अभंग रिपोर्टर दिनांक १५ जून २०२५ :- अकोला शहरातील खदान पोलीस स्टेशन हद्दीतील कौलखेड चौकात फादर्स डेच्या मध्यरात्री दोन मद्यधुंद दोघांमध्ये भीषण हाणामारी झाली. या झटापटीत यवतमाळ येथील ३२ वर्षीय गंगाधर डाबेराव याचा जागीच मृत्यू झाला. घटनास्थळी पोलीस दाखल होताच मृतदेह पोस्टमार्टमसाठी हलवण्यात आला असून, एलसीबीने एक संशयिताला ताब्यात घेतले आहे. पोलिसांनी तपास सुरू केला असून, खूनाचा उद्देश अद्याप स्पष्ट झालेला नाही.
कौलखेड चौकात मध्यरात्री थरारक हाणामारी
शनिवार १४ जूनच्या मध्यरात्री अकोल्याच्या खदान पोलीस स्टेशनच्या हद्दीतील कौलखेड चौकात एक भीषण घटना घडली. रात्री १२:३० च्या सुमारास, दोघे नशेच्या प्रभावाखाली लाकडी दंडुका आणि दगडाने एकमेकांवर तुफान हल्ला करत होते. काही क्षणांतच ही हाणामारी इतकी उग्र झाली की, यवतमाळ येथील रहिवासी गंगाधर डाबेराव (वय ३२) याचा रक्ताच्या थारोळ्यात जागीच मृत्यू झाला.
दुर्दैव म्हणजे, ही घटना घडत असताना परिसरात कोणतीही तत्काळ मदत उपलब्ध नव्हती. पहाटे ५ वाजण्याच्या सुमारास एक स्थानिक नागरिकाने रस्त्यावर मृतदेह पाहून पोलीसांना माहिती दिली. त्यानंतर अकोला शहर उपविभागीय पोलिस अधिकारी सतीश कुलकर्णी, स्थानिक गुन्हेशाखेचे पोलिस निरीक्षक शंकर शेळके व खदान पोलिस स्टेशन चे पोलिस निरीक्षक मनोज केदार हे आपल्या ताफ्यासह घटनास्थळी पोहोचले. त्यांनी पंचनामा करून मृतदेह जिल्हा सामान्य रुग्णालयात पाठवला.
पोलीस तपासात गती – एक संशयित अटकेत
या खुनाच्या तपासात एलसीबी (स्थानिक गुन्हे शाखा) सक्रिय झाली आहे. प्राथमिक तपासानंतर एका संशयिताला ताब्यात घेण्यात आले असून, त्याच्याकडे चौकशी सुरू आहे. खूनाचा उद्देश अद्याप स्पष्ट झाला नसून, पोलीस ‘हे वैयक्तिक वादामुळे घडले का अन्य कोणत्याही कारणास्तव?’ याचा शोध घेत आहेत.
सध्या घटनास्थळावरील सीसीटीव्ही फुटेज, प्रत्यक्षदर्शींची माहिती आणि संशयिताचे मोबाईल कॉल रेकॉर्ड तपासले जात आहेत. पोलीस निरीक्षक खंडारे यांनी सांगितले की, “हा प्रकार गंभीर असून शहराच्या सुरक्षिततेच्या दृष्टीने ही घटना चिंतेची आहे. सत्य समोर आणण्यासाठी सर्व यंत्रणा सक्रिय आहेत.”
नशा, रात्र आणि राग” – ही त्रिकूटे बनली मृत्यूचं कारण
ही घटना पुन्हा एकदा शहरी भागात वाढणाऱ्या मद्यप्राशनाच्या आणि हिंसक प्रवृत्तीच्या समस्यांवर प्रकाश टाकते. सार्वजनिक ठिकाणी मद्यपान, वाद, आणि त्यातून उद्भवणारे गुन्हे हे अलीकडच्या काळात चिंतेचा विषय बनले आहेत. नागरिकांच्या सुरक्षेसाठी अधिक कडक पोलीस गस्त आणि रात्रीच्या वेळी मद्यविक्रीवर नियंत्रणाची गरज आता अधोरेखित झाली आहे.
तुमचं मत, तुमच्या अडचणी आता सर्वांपर्यंत पोहोचतील !
तुमच्या आसपासची कोणतीही घटना, समस्या, तक्रार, बातमी, अडचण, किंवा सामाजिक प्रश्न तुमच्याकडे असल्यास आम्हाला पूर्ण माहिती आणि फोटो/व्हिडीओसह
👉 https://tinyurl.com/3mb7zrjj 👈 या लिंक वर क्लिक करून पाठवा. आमचं न्यूज चॅनल तुमचं म्हणणं लोकांपर्यंत पोहोचवेल !
[कॉपीराईट © 2025 | ANN Akola News Network]
