अकोला जिल्हा नियोजन समितीच्या बैठकीत भाजप आमदार रणधीर सावरकर आणि ठाकरे गटाचे आमदार नितीन देशमुख यांच्यात दलित वस्तीच्या प्रश्नावरून तीव्र वाद. दोघांमध्ये प्रचंड अश्लील शिवीगाळ झाली. अधिकारी व मंत्र्यांनी दोघांना रोखल्यामुळे हाणामारी टळली. राजकीय सौजन्याचा फज्जा उडाल्याची चर्चा.
जिल्हा नियोजन समितीची बैठक वादात, दलित वस्तीचा प्रश्न ठरला वादाचा केंद्रबिंदू
अकोला जिल्हा नियोजन समितीची बैठक नेहमीसारखी विकासकामांच्या आढाव्यासाठी बोलावण्यात आली होती. पालकमंत्री आकाश फुंडकर यांच्या अध्यक्षतेखाली सुरू असलेल्या या बैठकीत अचानक वातावरण चिघळले. दलित वस्तीतील निधीच्या वाटपावरून भाजप आमदार रणधीर सावरकर आणि ठाकरे गटाचे आमदार नितीन देशमुख यांच्यात वाद सुरू झाला.
हा वाद इतका विकोपाला गेला की, दोन्ही आमदार एकमेकांकडे धावून गेले. सभागृहात असलेल्या अधिकाऱ्यांसह पालकमंत्री आणि इतर आमदारांनी वेळीच हस्तक्षेप करून दोघांना वेगळं केलं. अन्यथा, शाब्दिक वाद हाणामारीत रुपांतरित झाला असता, अशी उपस्थितांची प्रतिक्रिया.
राजकीय संस्कृतीवर प्रश्नचिन्ह; सार्वजनिक सभेत अश्लील भाषेचा वापर
सार्वजनिक प्रशासकीय बैठकीत अश्लील भाषेचा वापर आणि आक्रमक भूमिका घेतल्यामुळे दोन्ही आमदारांच्या वर्तनावर टीका होत आहे. जिल्हा नियोजन समितीच्या सभेसारख्या संवेदनशील ठिकाणी दलित वस्तीच्या विकासासारख्या मुद्द्यावर इतका वाद होणे, ही राजकीय अपरिपक्वतेची निशाणी असल्याचे जाणकारांनी मत व्यक्त केले.
ही बैठक विकासाच्या योजनांसाठी असून, मतभेद असूनही चर्चा संयमाने करणे अपेक्षित असते. मात्र, अकोल्यात याचे अक्षरशः उल्लंघन झाले. यामुळे अकोला जिल्ह्यातील लोकप्रतिनिधींच्या कार्यशैलीबाबत नागरिकांमध्ये नाराजीचे सूर उमटत आहेत.
