एसटी महामंडळाच्या ७७ व्या वर्धापन दिनानिमित्त आयोजित कार्यक्रमात महाराष्ट्राचे परिवहन मंत्री प्रताप सरनाईक यांनी राज्य परिवहन व्यवस्थेला नवा चेहरा देण्याचा संकल्प व्यक्त केला. ‘स्मार्ट एसटी’ ही केवळ घोषणा नसून एक दूरदृष्टी आहे, असे सांगत त्यांनी प्रवाशांच्या सुविधांसोबतच कर्मचाऱ्यांची आर्थिक स्थिती सुधारण्यावर भर देण्याचा मानस व्यक्त केला.
मुंबईतील यशवंत नाट्य मंदिर येथे झालेल्या या कार्यक्रमात एसटी महामंडळाचे उपाध्यक्ष व व्यवस्थापकीय संचालक डॉ. माधव कुसेकर, तसेच वरीष्ठ अधिकारी व कर्मचारी मोठ्या संख्येने उपस्थित होते.
मंत्री सरनाईक म्हणाले की, “गेल्या ७७ वर्षांत एसटी महामंडळ हे ग्रामीण भागातील नागरिकांचे जीवनरेषा ठरले आहे. ऊन, वारा, पाऊस याची पर्वा न करता राज्याच्या कानाकोपऱ्यात सेवा पुरविणारे एसटी हे देशातील अतिशय मोजक्या दीर्घकालीन संस्थांपैकी एक आहे. सामान्य जनतेच्या आशीर्वादामुळे ही संस्था आजही ठामपणे उभी आहे.”
आगाऊ आरक्षणास १५% सवलत, अधिकारी गौरव सोहळा ठरला विशेष
या कार्यक्रमात “बस फॉर असं” या संस्थेने तयार केलेले एसटीचा ७७ वर्षांचा प्रवास चित्ररूपात सादर करणारे ‘वाहननामा’ हे कॉफी टेबल पुस्तक प्रसिद्ध करण्यात आले. याशिवाय विविध विभागांतील उत्कृष्ट सेवा देणाऱ्या अधिकाऱ्यांना ‘अध्यक्ष सुवर्णपदक’ आणि प्रशस्तीपत्र देऊन सन्मानित करण्यात आले. त्यामध्ये विजय गीते, सुनील महाले, पंकज महाजन, सुरेंद्र तांदळे आणि अक्षय केंकरे यांचा समावेश होता.
प्रवाशांना दिलासा देणारी मोठी घोषणा करताना सरनाईक म्हणाले, “लांब पल्ल्याच्या प्रवासासाठी आगाऊ आरक्षण करणाऱ्या प्रवाशांना तिकीट दरात १५% सवलत मिळेल. ही योजना येत्या जुलैपासून कार्यान्वित केली जाईल. ई-शिवनेरीसारख्या सेवांचा लाभ घेणाऱ्या प्रवाशांना याचा थेट फायदा होईल.”
एसटीचा सामाजिक प्रवास आणि पुढची दिशा
एसटीचे कार्य हे केवळ वाहतूकपुरते मर्यादित न राहता सामाजिक समावेशाचे प्रतीक ठरले आहे. आदिवासी पाड्यांपासून ते शहरांपर्यंत प्रत्येकासाठी प्रवेशयोग्य बनवलेली ही सेवा म्हणजे खऱ्या अर्थाने महाराष्ट्राच्या सर्वसामान्यांची जीवनवाहिनीच आहे.
मंत्री सरनाईक यांनी स्पष्ट केले की, “सामाजिक आणि आर्थिक दृष्ट्या सक्षम, तंत्रज्ञानावर आधारित आणि स्वच्छता, सुरक्षा या सर्व निकषांवर खरे उतरलेली ‘स्मार्ट एसटी’ भविष्यात संपूर्ण देशासाठी एक आदर्श ठरेल.”
आपल्याला ही योजना कशी वाटली? एसटी सेवा सुधारण्यासाठी तुमच्या सूचनाही आम्हाला कळवा. आणखी बातम्या, विशेष योजना आणि सार्वजनिक सेवांबाबत अपडेट्ससाठी आमच्या पोर्टलला नियमित भेट द्या!
