अकोला न्यूज नेटवर्क ब्युरो दिनांक १० एप्रिल २०२५:- सरकारने आणीबाणीच्या वैद्यकीय परिस्थितीत रुग्णांना तात्काळ मदत मिळावी यासाठी 108 आणि 102 या अत्याधुनिक रुग्णवाहिका सेवा सुरु केल्या आहेत. मात्र, अकोला जिल्ह्यात या सेवांमध्ये गंभीर हलगर्जीपणा उघड झाला आहे. या सेवांमुळे नागरिकांना दिलासा मिळण्याऐवजी, रुग्णांच्या जीवाशी खेळ होतो आहे, ही अत्यंत चिंताजनक बाब आहे.
रुग्णवाहिकेत नियुक्त डॉक्टरांचा प्रमुख उद्देश रुग्णाच्या प्रकृतीवर तातडीने लक्ष ठेवणे आणि गरजेनुसार उपचार सुरू करणे असा असतो. मात्र प्रत्यक्षात अकोला जिल्ह्यातील अनेक रुग्णवाहिकांमध्ये डॉक्टर रुग्णाजवळ न बसता चालकाच्या शेजारी बसत असल्याचे प्रकार समोर आले आहेत. अशा स्थितीत गंभीर अवस्थेतील रुग्णांना जीवनावश्यक उपचार मिळत नाहीत, परिणामी त्यांचा जीव धोक्यात येतो.
आणीबाणीच्या प्रसंगी प्रत्येक क्षण महत्वाचा असतो. वेळेवर दिलेल्या उपचारांमुळे अनेक रुग्णांचे प्राण वाचू शकतात. परंतु रुग्णवाहिकेत डॉक्टर उपस्थित असूनही, ते उपचारात सहभागी होत नसल्याने ही सेवा निष्क्रिय ठरत आहे. हा निष्काळजीपणा केवळ वैयक्तिक दुर्लक्ष नाही, तर आरोग्य व्यवस्थेतील गंभीर अपयश ठरत आहे.
सामान्य जनतेचा सरकारच्या यंत्रणांवर विश्वास असतो, पण अशाiप्रकारांमुळे तो डगमगतो. त्यामुळे आरोग्य विभागाने तात्काळ चौकशी करून संबंधित कर्मचाऱ्यांवर कठोर कारवाई करणे अपेक्षित आहे.
रुग्णवाहिका ही केवळ वाहन नाही तर एक चालते फिरते हॉस्पिटल असते. त्यामध्ये योग्य वैद्यकीय सुविधा, प्रशिक्षित कर्मचारी, आणि आपत्कालीन परिस्थिती हाताळण्याची तयारी असणे आवश्यक आहे. सध्या समोर आलेल्या प्रकारांवरून हे स्पष्ट होते की यंत्रणेतील शिस्त ढासळली आहे.
या घटना केवळ अकोलापुरत्या सीमित नाहीत. अन्य जिल्ह्यांमध्येही अशी परिस्थिती असण्याची शक्यता नाकारता येत नाही. त्यामुळे राज्य पातळीवर रुग्णवाहिका सेवांची सखोल तपासणी करून सर्वत्र योग्य कार्यपद्धती लागू करणे ही काळाची गरज आहे.
सरकारने सुरू केलेल्या 108 आणि 102 रुग्णवाहिका सेवा जनतेसाठी आशेचा किरण ठरल्या आहेत. परंतु त्या अंमलबजावणीतच त्रुटी राहिल्यास जनतेचा जीव धोक्यात येतो. डॉक्टरांनी आपल्या जबाबदाऱ्या पार पाडणं गरजेचं आहे. प्रशासनाने यावर तातडीने कारवाई करून जनतेचा विश्वास पुन्हा मिळवावा, अशी अपेक्षा सर्वसामान्य नागरिक करत आहेत.
