अकोला न्यूज नेटवर्क ब्युरो दिनांक ८ एप्रिल २०२५:जिल्ह्यात सध्या रस्त्यांवर एक वेगळीच आणि धोकादायक स्थिती निर्माण झाली आहे. क्षमतेपेक्षा अधिक माल वाहून धावणारी वाहने म्हणजेच ‘ओव्हरलोड’ ट्रक व इतर वाहने सर्रासपणे रस्त्यांवरून फिरत आहेत. या वाहनांचा मुक्तसंचार हा नागरिकांच्या सुरक्षेसाठी मोठा धोका निर्माण करत आहे. दुर्दैवाची गोष्ट म्हणजे, ही सगळी धुडगूसखोरी प्रशासनाच्या डोळ्यांदेखत सुरू असूनदेखील कोणतीही ठोस कारवाई होताना दिसत नाही.
वाहतुकीचे नियम हे सर्वसामान्य नागरिकांनी पाळावे, असेच प्रशासनाला वाटते. मात्र मोठ्या ट्रकचालक व मालकांसाठी हे नियम केवळ कागदावरच राहिले आहेत, असे चित्र सध्या अकोला जिल्ह्यात पाहायला मिळत आहे. ओव्हरलोडिंग करणारी वाहने केवळ रस्त्यांची वाट लावत नाहीत, तर नागरिकांच्या जिवाशीही खेळत आहेत. रस्त्यावर ब्रेक फेल होणे, गाडी पलटी होणे, अरुंद रस्त्यांवर अडथळा निर्माण होणे अशा घटनांमुळे अपघाताच्या प्रमाणात लक्षणीय वाढ झाली आहे.
या ओव्हरलोड वाहनांच्या मुक्तसंचारामागे दलालांचा मोठा हात असल्याचे बोलले जात आहे. हे दलाल प्रशासनातील संबंधित अधिकाऱ्यांपर्यंत आर्थिक देवाणघेवाण करून ओव्हरलोड वाहतूक सुसाटपणे चालू ठेवण्याचे व्यवस्थापन करतात, असा आरोप नागरिकांमध्ये आहे. विशेषतः आरटीओ, वाहतूक पोलीस आणि स्थानिक प्रशासन यांच्यावर संशयाचे बोट ठेवले जात आहे.
जेव्हा मीडिया किंवा नागरिकांचा दबाव वाढतो, तेव्हा काही वेळेस केवळ कारवाईचं नाटक उरकून पुन्हा सगळं पूर्ववत केलं जातं. काही ट्रक थांबवले जातात, दंड आकारण्यात येतो पण हे फक्त दाखवायचं काम असतं. प्रत्यक्षात मात्र रोज शेकडो ओव्हरलोड वाहने अकोल्यातील रस्त्यांवरून धावत असतात. यामुळे सामान्य नागरिकांमध्ये अस्वस्थता आणि असुरक्षिततेची भावना वाढीस लागली आहे.
या ओव्हरलोड वाहनांमुळे अकोल्यातील रस्त्यांचे प्रचंड नुकसान होत आहे. रस्ते खचतात, खड्डे पडतात आणि त्याचे नुकसान शेवटी सामान्य वाहनचालकांनाच सहन करावे लागते. शिवाय, ओव्हरलोड वाहने वळणावर नियंत्रण गमावतात, ब्रेक लावल्यावर वेळेत थांबत नाहीत, यामुळे अपघात होण्याची शक्यता अधिक असते.
ओव्हरलोड वाहतूक थांबवणे ही केवळ वाहतूक पोलिसांची जबाबदारी नाही, तर आरटीओ, स्थानिक पोलीस, जिल्हा प्रशासन आणि संबंधित खात्यांच्या एकत्रित प्रयत्नांची गरज आहे. पण या सगळ्यांचं मौन पाहता, कुठेतरी मिलीभगत असल्याचा संशय बळावतो.
अकोल्यातील ओव्हरलोडिंग ही केवळ वाहतूक नियमांची पायमल्ली नसून, ती नागरिकांच्या सुरक्षेवर झालेली थेट गदा आहे. प्रशासनाने वेळेत लक्ष न दिल्यास भविष्यात मोठे अपघात आणि जीवितहानी होण्याची शक्यता नाकारता येणार नाही. त्यामुळे आता वेळ आली आहे की नागरिकांनी सजग राहून या प्रश्नावर आवाज उठवावा, आणि जबाबदार यंत्रणांना जागं करावं.
“अकोल्याच्या रस्त्यांवर सुरक्षिततेचा गहाण ठेवला गेलेला हा व्यवहार थांबणार कधी?” – या प्रश्नाचे उत्तर शोधणे, ही आता आपली सगळ्यांची सामूहिक जबाबदारी आहे.
