अकोला न्यूज नेटवर्क ब्युरो दिनांक ५ एप्रिल २०२५:- जिल्ह्यातील हिवरखेड पोलीस ठाण्याच्या कार्यक्षमतेमुळे पशूंवरील एक गंभीर प्रकार समोर आला असून, पोलिसांनी ५ गोवंश जातीचे बैल कत्तलीसाठी घेऊन जात असलेल्या आरोपीस पकडून त्याच्यावर कायदेशीर कारवाई केली आहे. सदर घटना ५ एप्रिल २०२५ रोजी पहाटे १२:४० वाजता हिवरखेड ते वारखेड रोडवरील झरी बाजारकडे जाणाऱ्या डांबरी रस्त्यावर घडली.
ही कारवाई विजय फोकमारे यांनी केली असून, त्यांनी अप.क्र. ११०/२५ अंतर्गत कलम ५, ५(क), ९, ९(अ) महाराष्ट्र प्राणी संरक्षण अधिनियम तसेच प्राण्यांना क्रूरतेने वागण्यास प्रतिबंधक अधिनियम कलम ११ अन्वये गुन्हा नोंदविला. सदर कारवाईत PSI गोपाल गिलबिले यांच्या पुढाकाराने ही धडाकेबाज कारवाई पार पडली.
कत्तलीसाठी कृरतेने नेले जात होते गोवंश बैल
सदर घटनेची माहिती अशी की, आरोपी हा ५ गोवंश जातीचे गोरे बैल, एकूण किंमत अंदाजे ५२,००० रुपये, कत्तलीसाठी नेत असताना पोलिसांना संशय आल्याने त्यांनी कारवाई केली. बैलांना कोणतेही योग्य वाहन अथवा संरक्षण न देता, कृरतेने रस्त्यावरून हाकलत नेले जात होते. पोलिसांनी वेळीच हस्तक्षेप करून बैलांसह आरोपीला पकडले.
घटनास्थळी पोलीस आणि पंचांसमक्ष पंचनामा करून वरील गोवंश बैल जप्त करण्यात आले. सदर गोवंश प्राण्यांना तत्काळ अकोट येथील अधिकृत गौशाळेत हलविण्यात आले जेणेकरून त्यांचे योग्य रक्षण व पालन पोषण करता येईल
सदर आरोपीविरुद्ध गुन्हा दाखल करण्यात आला असून तपास अधिकारी PSI गोपाल गिलबिले पुढील चौकशी करत आहेत. आरोपीकडून अधिक माहिती मिळवून पशू तस्करीच्या मोठ्या रॅकेटचा पर्दाफाश होण्याची शक्यता असून पोलीस यावर गंभीर दृष्टीने काम करत आहेत.
प्राणी संरक्षण कायद्यांची कठोर अंमलबजावणी आवश्यक
या घटनेमुळे पुन्हा एकदा प्राणी संरक्षण आणि पशूंवरील क्रूरतेबाबतचे प्रश्न ऐरणीवर आले आहेत. महाराष्ट्र प्राणी संरक्षण अधिनियम व प्राण्यांना क्रूरतेपासून वाचविणारे कायदे असले तरी अशा प्रकारच्या घटनांमध्ये सातत्याने वाढ होताना दिसते. प्रशासन व पोलिसांनी वेळोवेळी अशा गुन्ह्यांना आळा घालण्यासाठी कठोर पावले उचलणे गरजेचे आहे.
हिवरखेड पोलिसांची ही कारवाई निश्चितच कौतुकास्पद असून, त्यांच्या तत्परतेमुळे पाच निरपराध गोवंश प्राणी कत्तलीच्या मार्गावरून वाचले. प्राणीमात्रांप्रती सहवेदना आणि कायद्याचा आदर राखत, अशा घटना रोखण्यासाठी सर्वांनी मिळून कार्य करणे हेच या घटनेतून मिळणारे मुख्य धडे आहेत.
