अकोला न्यूज नेटवर्क ब्युरो स्वप्नील सुरवाडे प्रतिनिधी पातूर, दिनांक २८ फेब्रुवारी २०२५:- शहराच्या मध्यवर्ती भागात असलेल्या तहसील कार्यालयासमोर भरदिवसा चोरीची घटना घडल्याने नागरिकांमध्ये भीतीचे वातावरण निर्माण झाले आहे. समाधान सुपाजी ठाकरे (वय ५३, रा. देऊळगाव) यांच्यासोबत घडलेल्या या प्रकारामुळे सुरक्षा व्यवस्थेवर प्रश्नचिन्ह उभे राहिले आहे.
घटना कशी घडली?
शुक्रवारी दुपारी सुमारे १२ वाजता समाधान ठाकरे कृषी उत्पन्न बाजार समितीत हरभरा विक्री करून १.३७ लाख रुपये घेऊन आपल्या दुचाकीने (एम.एच. ३० एएक्स ३३६८) पेट्रोल पंपाकडे जात होते. तहसील कार्यालयासमोरून जात असताना दोन दुचाकीस्वारांनी त्यांना थांबवून तुमचे पैसे खाली पडले असल्याचे सांगितले. ते मागे वळून पैसे पडले का हे पाहत असतानाच, चोरट्यांनी अत्यंत शिताफीने त्यांच्या दुचाकीला अडकवलेली निळसर रंगाची पैशांची पिशवी लंपास केली.
पोलिसांचा तपास सुरू
सदर घटनेनंतर समाधान ठाकरे यांनी तातडीने पातूर पोलीस ठाण्यात तक्रार दाखल केली. पोलिसांनी अज्ञात आरोपींविरोधात गुन्हा नोंदवून तपास सुरू केला आहे. ठाणेदार हनुमंत डोपेवाड यांच्या मार्गदर्शनाखाली पातूर पोलीस या प्रकरणाचा कसून तपास करत आहेत.
शहरातील वाढती चोरीची प्रकरणे – नागरिकांमध्ये चिंता
पातूर शहर आणि परिसरात अलिकडच्या काही महिन्यांत चोरीच्या घटना वाढत आहेत. गर्दीच्या ठिकाणीही चोरटे सक्रिय असल्याचे या घटनेवरून स्पष्ट झाले आहे. तहसील कार्यालयासमोरच भरदिवसा चोरी होणे म्हणजे सुरक्षेच्या उपाययोजनांवर मोठा प्रश्नचिन्ह उभे राहतो.
सावध राहा! पोलिसांचे नागरिकांना आवाहन
पोलिसांनी नागरिकांना सावधगिरी बाळगण्याचे आवाहन केले आहे. मोठी रक्कम वाहून नेताना विशेष खबरदारी घ्यावी, गर्दीच्या ठिकाणी अनोळखी व्यक्तींशी सतर्क राहावे, तसेच संशयास्पद हालचाली दिसल्यास तातडीने पोलिसांना कळवावे, असे आवाहन करण्यात आले आहे.
